ADYM.KZ / Түркістан облысында отандық ауыл шаруашылығы үшін маңызды өндіріс ошағы жұмысын бастады. Өңірде заманауи агродрондарды (ұшқышсыз ұшу аппараттарын) құрастыратын жаңа зауыт іске қосылды.
Ірі жобаны «Avatar Agricultural Technology Development» серіктестігі қолға алып, сәтті жүзеге асырды.
Жаңа кәсіпорын заманауи технологиялармен жабдықталған және еліміздің агросекторын отандық өніммен қамтуды көздейді.
Зауыт жылына 500 дана ұшқышсыз ұшу аппаратын шығаруға қауқарлы. Бір агродрон 70 литрге дейін жұмыс сұйықтығын (тыңайтқыштар мен дәрілік заттарды) көтере алады. Бір рет ұшқанда 5 гектарға дейінгі егіс алқабын толық қамтып, бүрку жұмыстарын жоғары дәлдікпен орындайды.
Ауыл шаруашылығында ұшқышсыз аппараттарды қолдану отандық тауар өндірушілерге lәрілік заттар мен суды үнемді әрі тең деңгейде шашуға мүмкіндік тудырады. Алқаптарды өңдеу жылдамдығы бірнеше есе артады. Жұмыс істеу процесі автоматтандырылып, адам факторы мен зиянды заттардың әсері азаяды.
Жаңа отандық өнімге деген сұраныс қазірдің өзінде жоғары. Кәсіпорын іске қосыла салысымен, агродрондарды сатып алуға 20 тапсырыс қабылдап үлгерген.
«Avatar Agricultural Technology Development» компаниясы алдағы уақытта өнім түрлерін айтарлықтай кеңейтуді көздеп отыр.
Келесі жылдан бастап зауыт тек ауыл шаруашылығы емес, өрт сөндіруге және жүк тасымалдауға арналған арнайы ұшқышсыз ұшу аппараттарын шығаруды игеруді жоспарлауда.
Түркістан облысында басталған бұл жоба Қазақстанның агроөнеркәсіп кешенін цифрландыруға және инновациялық технологияларды енгізуге жасалған үлкен қадам болып табылады.
