ADYM.KZ / Өзбекстанның Наманган қаласында Мақом өнерінің III халықаралық форумы аясында «Шығыс мақомының жаңа бағыттары: дәстүр мен жаңашылдық сабақтастығы» атты халықаралық ғылыми-тәжірибелік конференция өтті.
Форумның ашылу салтанатына Өзбекстан Президенті Шавкат Мирзиёев қатысып, мәдени мұраны сақтау мен дамыту мәселелеріне тоқталды.
Қазақстан атынан конференцияға Мәдениет және ақпарат вице-министрі Айбек Сыдықов қатысты. Ол өз сөзінде Мемлекет басшысы Қасым-Жомарт Тоқаевтың мәдениет саласын дамытуға, тарихи мұраны сақтауға және ұлттық құндылықтарды дәріптеуге ерекше көңіл бөлетінін атап өтті.
Вице-министр мақом өнерінің қазақтың дәстүрлі музыка мәдениетімен тығыз үндесетінін айтып, күй, жыр, терме, айтыс және дәстүрлі ән өнерінің ұлттың рухани мұрасын сақтаудағы маңызын атап өтті.
Конференция барысында дәстүрлі өнерді цифрлық дәуірде сақтау, мәдени мұраны цифрландыру және жастардың классикалық музыкаға қызығушылығын арттыру мәселелері талқыланды.
Жиында Қазақстан мен Өзбекстан арасындағы мәдени ынтымақтастыққа да назар аударылды. Атап айтқанда, «Салтанат» мемлекеттік би ансамблінің Хиуа қаласында өткен III халықаралық «Лазги» би фестивалінде «Ең үздік сахналанған би» аталымын жеңіп алғаны айтылды. Сондай-ақ өзбекстандық өнерпаздардың Халық қаһарманы Роза Бағланова атындағы халықаралық вокал байқауына қатысып, Мухаддас Алиеваның арнайы жүлдеге ие болғаны атап өтілді.
Форумның маңызды оқиғаларының бірі – Әндіжан қаласына Түркі әлемінің мәдени астанасы мәртебесінің берілуі болды. Еске салсақ, бұл мәртебе 2024 жылы Ақтау қаласына берілген еді.
Халықаралық форумға ЮНЕСКО, ИСЕСКО, ТҮРКСОЙ, Түркі мемлекеттері ұйымы және басқа да халықаралық құрылымдардың өкілдері қатысты. Іс-шараға әлемнің 80-нен астам елінен 250-ге жуық мәдениет және өнер қайраткері жиналса, ғылыми конференцияға 60-қа жуық елден келген 100-ден астам ғалым мен сарапшы қатысты.
