ADYM.KZ / Сенат «Қазақстан Республикасының кейбір заңнамалық актілеріне экологияны жетілдіру және экономиканың жекелеген салалары мәселелері бойынша өзгерістер мен толықтырулар енгізу туралы» заңды екінші оқылымда қарап, Мәжіліске қайтарды.
Сенаторлар құжаттың жекелеген нормаларына түзетулер енгізіп, баптардың бірін жаңа редакцияда ұсынуына байланысты заң жобасын қайта қарауға жіберді.
Заң жобасы Жер, Орман, Кәсіпкерлік, Экологиялық және Су кодекстеріне, сондай-ақ қолданыстағы жеті заңға өзгерістер мен толықтырулар енгізуді көздейді.
Сенатор Сұлтан Дүйсембиновтің айтуынша, құжат экология саласын цифрландыруға, қалдықтарды басқару және қайта өңдеу жүйесін жетілдіруге, климаттық реттеу мен көміртегі офсеттері тетіктерін дамытуға бағытталған. Сонымен қатар Ұлттық гидрометеорологиялық қызметтің тиімділігін арттыру және экологиялық бақылауды күшейту мәселелері де қамтылған.
Бұдан бөлек, заң жобасында мемлекеттік экологиялық сараптама жүргізу және қоғамдық тыңдауларды ұйымдастыру тәртібіне қатысты бірқатар нормаларды нақтылау ұсынылған.
Енді құжат Сенат енгізген түзетулерді қарау үшін Мәжіліске жолданды.
