ADYM.KZ / Қазақстанда көктемгі су тасқынын дәлірек болжауға мүмкіндік беретін америкалық технологиялар енгізіледі. Бұл туралы Су ресурстары және ирригация министрлігі хабарлады.
Жоба аясында ведомство қар жамылғысын әуеден бақылауға маманданған АҚШ компанияларымен бірлесіп жұмыс істемек. Арнайы жабдықтар қар қабатын әуеден сканерлеп, көктемде еріген қар суының көлемін алдын ала есептеуге мүмкіндік береді.
Министрліктің мәліметінше, жаңа технологиялар су тасқыны қаупін ертерек анықтап, халықты, тұрғын үйлерді және ауыл шаруашылығы алқаптарын қорғауға бағытталған шараларды уақытылы қабылдауға көмектеседі.
Пилоттық жоба алғаш рет Ақмола облысындағы Жабай өзені алабында жүзеге асырылады. Бұл өңір көктем мезгілінде су тасқыны жиі тіркелетін аймақтардың бірі саналады.
Мамандардың айтуынша, жоба нәтижелері технологияның тиімділігін бағалауға және оны еліміздің су тасқыны қаупі жоғары басқа өңірлеріне енгізу мүмкіндігін қарастыруға негіз болады.
