ADYM.KZ / 2026 жылдың басынан бері Қазақстанда 2,1 млн-нан астам адамға қашықтан медициналық қызмет көрсетілді. Оның 39 пайызы – ауыл тұрғындары. Бұл туралы Денсаулық сақтау министрлігінің баспасөз қызметі хабарлады.
Ведомствоның мәліметінше, жыл басынан бері елімізде 1 млн-нан астам телеконсультация өткізілген. Қашықтан медициналық көмек көрсетуге 709 медициналық ұйымның мамандары тартылған.
Телемедицина әсіресе шалғай елді мекендердегі тұрғындар үшін маңызды құралға айналып отыр. Бұрын ауыл тұрғыны бейінді дәрігердің кеңесін алу үшін облыс орталығына немесе ірі қалаға баруға мәжбүр болса, қазір бірқатар медициналық қызметті қашықтан алуға мүмкіндік бар.
Ауыл тұрғындарына маман көмегі қашықтан көрсетіледі
Денсаулық сақтау жүйесінде пациенттің маршруты бірнеше кезең бойынша ұйымдастырылған.
Атап айтқанда, ауылдағы фельдшерлік-акушерлік пункт немесе амбулатория арқылы пациенттің жағдайы бағаланып, қажет болған жағдайда үйлестіру орталығына өтінім жіберіледі. Одан кейін бейінді маман телеконсультация өткізіп, әрі қарайғы емдеу немесе бақылау тактикасы айқындалады.
Маршруттың негізгі кезеңдері:
ауылдық фельдшерлік-акушерлік пункт немесе амбулатория → үйлестіру орталығы → маманның телеконсультациясы → медициналық шешім → қашықтан бақылау.
Бұл тәсіл ауыл тұрғындарының қажетті медициналық көмекке қолжетімділігін арттыруға мүмкіндік береді.
Қазір ауылдық денсаулық сақтау саласында 1 122 медицина қызметкері тапшы. Телемедициналық технологиялар кадр тапшылығын толық шешпегенімен, бейінді мамандардың тәжірибесін шалғай елді мекендерге жеткізуге мүмкіндік беріп отыр.
Қандай медициналық қызметтер қолжетімді?
Бүгінде қашықтан медициналық қызмет көрсету аясында электрокардиография, жедел талдаулар және цифрлық медициналық құрылғылар арқылы жүргізілетін бірқатар зерттеу түрлері қолжетімді.
Алдағы уақытта телемедициналық қызметтердің қатарын УДЗ, флюорография, рентген және генетик консультациясы арқылы кеңейту жоспарланып отыр.
Цифрлық медициналық контурға қылмыстық-атқару жүйесінің 72 мекемесі де қосылған. Оның аясында шамамен 12 мың сотталған адам қамтылған.
Мектеп медицинасын цифрлық сүйемелдеу жүйесіне 6 936 мектеп пен 3,67 млн бала қосылған.
Санитариялық авиация жұмысы да цифрландырылды
Денсаулық сақтау саласын цифрландыру санитариялық авиация қызметіне де әсер етті.
Атап айтқанда, санитариялық авиацияның ұшып шығуына өтінім рәсімдеу уақыты 180 минуттан 30 минутқа дейін қысқарған.
Бұл шұғыл медициналық көмек қажет болған жағдайда шешім қабылдау мен мамандардың оқиға орнына жету уақытын қысқартуға мүмкіндік береді.
Осылайша, цифрлық технологиялар денсаулық сақтау жүйесін орталықтандырылған қызмет моделінен пациентке барынша жақындатуға мүмкіндік беріп отыр. Әсіресе ауылдар мен шалғай елді мекендер үшін телемедицина бейінді мамандардың көмегін қашықтан алудың маңызды тетігіне айналуда.
