ADYM.KZ / Ұлытау облысында 36 мың шаршы шақырым аумақты қамтитын кешенді геологиялық зерттеулер жүргізіліп жатыр. Бұл жұмыстар Мемлекет басшысы Қасым-Жомарт Тоқаевтың Қазақстан аумағының геологиялық зерттелу деңгейін арттыру жөніндегі тапсырмалары аясында жүзеге асуда.
Өнеркәсіп және құрылыс министрі Ерсайын Нағаспаев өңірге жұмыс сапары барысында геологиялық барлау жұмыстарының барысымен танысты.
Биыл Қазақстанның 11 өңіріндегі 20 учаскеде 1:50 000 масштабтағы геологиялық түсірілім басталды. Зерттеу жұмыстарының жалпы аумағы 100 мың шаршы шақырымнан асады. Оның ішінде Ұлытау облысында жеті учаске қамтылған.
Зерттеу барысында заманауи аэрогеофизикалық және геохимиялық әдістер қолданылып жатыр. Мамандар Жерді қашықтан зондтау деректерін талдап, ұшқышсыз аэрогеофизикалық кешендер мен жоғары дәлдіктегі Ionic Leach әдісін пайдалануда.
«Жер қойнауын кең ауқымда геологиялық зерттеу – Мемлекет басшысы Қасым-Жомарт Кемелұлы Тоқаевтың министрлік пен жалпы сала алдына қойған негізгі стратегиялық міндеттерінің бірі. Біздің басты міндетіміз – сапалы геологиялық ақпарат алу. Бұл геологиялық барлау ісіне инвестиция тартуға және өнеркәсіп салаларын дамытуға тікелей байланысты», – деді Ерсайын Нағаспаев.
Ұлытау облысында «Kazakhmys Barlau» компаниясы аэромагниттік түсірілім, аэрогамма-спектрометрия және аэрогравиметрия жұмыстарын жүргізіп жатыр. Бұл технологиялар үлкен аумақтарды қысқа мерзімде зерттеп, олардың геологиялық әлеуетін жедел бағалауға мүмкіндік береді.
Сонымен қатар Ұлытау және Абай облыстарында 300-ге жуық ұңғыма бұрғыланған.
Жер қойнауын мемлекеттік геологиялық зерттеу бағдарламасы аясында жер қойнауының бірыңғай цифрлық кадастры қалыптастырылып жатыр. Жүйеде перспективалы учаскелердің электрондық паспорттары жасалады.
Бұл геологиялық ақпараттың ашықтығы мен қолжетімділігін арттырып, деректерді өңдеу уақытын қысқартуға мүмкіндік береді. Алғашқы перспективалы учаскелерді инвесторларға 2027 жылдан бастап аукцион арқылы ұсыну жоспарланып отыр.
Министр сондай-ақ Ұлытаудағы Геологиялық кластердің жұмысымен танысты. Мұнда керндерді қабылдау және сақтау, зертханалық талдау, геофизикалық зерттеулер мен басқа да жұмыстарды бір жүйеге біріктіру көзделген.
Геологиялық кластер Орталық Азиядағы ірі ғылыми-өндірістік және білім беру кешендерінің біріне айналмақ.
Іссапар қорытындысы бойынша Ерсайын Нағаспаев геологиялық зерттеу жұмыстарын сапалы жүргізу, белгіленген көлемдер мен мерзімдерді сақтау жөнінде тиісті тапсырмалар берді.
