АҚШ Конгресінің делегациясы Астана қаласындағы Креативті индустрияларды дамыту қорына барып, Қазақстанда осы бағытта жүзеге асырылып жатқан жобалармен танысты, деп хабарлайды Adym.kz ақпараттық сайты ҚР Мәдениет және ақпарат министрлігінің баспасөз қызметіне сілтеме жасап.
Кездесу барысында шетелдік қонақтарға қор қызметінің негізгі бағыттары, креативті экономиканы дамытуға арналған бастамалар және отандық шығармашылық кәсіп өкілдеріне көрсетіліп жатқан қолдау шаралары таныстырылды.
Делегация мүшелері қазақстандық шеберлер мен креативті индустрия өкілдерінің қолынан шыққан түрлі бұйымдарды тамашалады. Атап айтқанда, қонақтарға зергерлік өнер, ағаш және тері өңдеу, ұлттық және заманауи музыкалық аспаптар жасау, сән индустриясы, кілем тоқу, қыш өнері мен бейнелеу өнері салаларындағы жұмыстар ұсынылды.
Экспозиция арқылы қазақ халқының дәстүрлі қолөнері мен ұлттық мәдени мұрасының қазіргі креативті индустриямен сабақтастығы көрсетілді. Шеберлердің еңбегі ұлттық құндылықтарды сақтап қана қоймай, оларды заманауи шығармашылық және кәсіпкерлік бағыттармен ұштастырудың мүмкіндігін танытты.
Сондай-ақ АҚШ Конгресінің делегациясына қазақ халқының бай мәдениеті мен дәстүрін дәріптейтін арнайы музыкалық бағдарлама ұсынылды. Қонақтар ұлттық өнер мен мәдени мұраның заманауи форматта насихатталуымен танысты.
Кездесу Қазақстандағы креативті индустрияның даму әлеуетін, ұлттық мәдениетті шығармашылық экономика арқылы ілгерілетудің мүмкіндіктерін және отандық шеберлердің халықаралық деңгейде таныла түсуіне жол ашатын бағыттарды көрсетуге мүмкіндік берді.
