ADYM.KZ / Өзбекстан астанасы Ташкентте маунтинбайктан 2026 жылғы Азия чемпионаты басталды. Құрлық біріншілігінің алғашқы жарыс күнінде Қазақстан құрамасы жүлдеге қол жеткізді.
Ұлттық олимпиадалық комитеттің мәліметінше, 23 жасқа дейінгі спортшылар арасында сынға түскен Юлия Ли XCC дисциплинасында қола медаль жеңіп алды. Осылайша қазақстандық велошабандоз чемпионаттың алғашқы күнінде ел қоржынына алғашқы жүлдені салды.
Бұл бағдарламада Қытай спортшылары көш бастады. Ван Тин чемпион атанса, оның отандасы Гун Сыин күміс медаль иеленді.
Айта кетейік, Ташкенттегі Азия чемпионатында Қазақстан құрамасының сапында сегіз спортшы өнер көрсетіп жатыр. Құрлық додасы 27 маусымға дейін жалғасады.
