ADYM.KZ / Түркістан қаласында туристерге арналған жаңа экскурсиялық бағыт іске қосылды. Қаланың туристік инфрақұрылымын дамыту және келушілерге қолайлы сервис ұсыну мақсатында Smart Shuttle Bus Turkistan жобасы аясында «Red Bus» экскурсиялық автобусы пайдалануға берілді.
Жаңа жобаның жұмысымен алғашқылардың бірі болып Түркістан қаласының әкімі Әзімбек Пазылбекұлы танысты. Қала басшысы экскурсиялық автобуспен жүріп өтіп, оның жайлылығы, қауіпсіздігі және қызмет көрсету сапасын бағалады.
Жоба Түркістандағы негізгі туристік және әлеуметтік нысандарды бір маршрутқа біріктіреді. Бағыт әуежайдан басталып, теміржол вокзалы, Жаңа мешіт, Ботаникалық бақ, Мұз сарайы, Әкімшілік-іскерлік орталық, Қожа Ахмет Ясауи кесенесі, Керуен-сарай туристік кешені, Қолөнершілер орталығы, Этноауыл, Ескек есу арнасы, Гауһар ана кесенесі және Орталық базар арқылы өтеді.
Экскурсиялық маршрутта туристер үшін заманауи цифрлық қызметтер қарастырылған. Жолаушылар QR-код арқылы билет сатып алып, 1 және 3 күндік Turkistan Pass жүйесін пайдалана алады. Сондай-ақ үш тілдегі аудиогид, Telegram және WhatsApp чат-боттары, онлайн карта және GPS мониторинг қызметтері қолжетімді. Бұдан бөлек, автобустың қозғалысын нақты уақыт режимінде бақылауға мүмкіндік бар.
Автобустар Wi-Fi желісімен, кондиционермен және USB қуаттау құрылғыларымен жабдықталған. Қозғалыс аралығы 15–20 минутты құрайды. Қызмет күн сайын сағат 08:00-ден 23:00-ге дейін көрсетіледі. Автобустар Визит орталығының автотұрағынан және Керуен-сарай кешені алдынан қатынайды.
Айта кетейік, «Red Bus» экскурсиялық автобусы 65 жолаушыға арналған. Билет құны балалар үшін 2 мың теңге, ал ересектер үшін 3 мың теңгені құрайды. Бағаға трансфер, гид және координатор қызметтері енгізілген.
