ADYM.KZ / Премьер-министр Олжас Бектенов Ұлттық қор қаражаты есебінен «Қазақстандық тұрғын үй компаниясын» (ҚТҮК) қосымша қаржыландыру тиімсіз екенін мәлімдеді. Бұл туралы ол Сенат депутаттарының сауалына берген жауабында айтты.
Үкімет басшысының айтуынша, халықты қолжетімді тұрғын үймен қамтамасыз ету мемлекеттік саясаттың негізгі басымдықтарының бірі болғанымен, құрылыс саласын қаржыландырудың қазіргі моделі мемлекеттік бюджетке ұзақ мерзімді тәуелділікті азайтуға бағытталуы тиіс.
Бектенов жаңа Бюджет кодексі өңірлердің қаржылық дербестігін арттыруды көздейтінін атап өтті. Соған сәйкес инженерлік-коммуникациялық инфрақұрылымды дамытуға арналған шығыстарды қаржыландыруда жергілікті атқарушы органдардың мүмкіндіктері кеңейтілген.
Оның айтуынша, инфрақұрылымдық жобаларды іске асыру үшін әкімдіктерге баламалы қаржыландыру құралдарын пайдалану ұсынылады. Қазіргі таңда өңірлер ішкі нарықта мемлекеттік бағалы қағаздар шығару арқылы қаражат тарта алады. Бұл тетік тұрғын үй құрылысы, жылу, су және электр желілерін салу мен жаңғырту жобаларын қаржыландыруға мүмкіндік береді.
Премьер-министр сондай-ақ Ұлттық қор қаражатын пайдалану мәселесіне тоқталды. Оның сөзінше, қолданыстағы заңнамаға сәйкес қор активтері есебінен заңды тұлғаларды несиелеуге және қазақстандық эмитенттердің қаржы құралдарын сатып алуға тыйым салынған. Мұндай шешім тек баламалы қаржыландыру көздері болмаған жағдайда және Президенттің арнайы шешімімен ғана қабылдануы мүмкін.
Үкімет басшысы қазіргі жағдайда Ұлттық қор активтерін сақтау және олардың көлемін 100 млрд АҚШ долларына дейін жеткізу міндеті тұрғанын еске салды. Сондықтан резервтерді кеңінен пайдалануға шектеу қойылып отыр.
Сонымен қатар Бектенов 2014–2016 жылдары ҚТҮК мен «Бәйтерек» холдингіне Ұлттық қордан жылдық 0,1 пайыздық мөлшерлемемен 490 млрд теңге көлемінде жеңілдікті қарыз берілгенін атап өтті. Бұл қаражат әлі толық қайтарылмаған және құрылыс секторында айналымда жүр. Қарызды қайтару 2034 жылдан бастап кезең-кезеңімен жүзеге асырылады.
«Осыған байланысты аталған мақсаттарға Ұлттық қордан қайтадан қаражат бөлу тиімсіз», – деді Премьер-министр.
