ADYM.KZ / Швейцарияның Лозанна қаласында дзюдодан Grand Slam халықаралық турнирі аяқталды. Қазақстан ұлттық құрамасы жарысты бір алтын медальмен қорытындылады.
81 келіге дейінгі салмақта белдескен Абылайхан Жұбаназар финалға дейін сәтті жетіп, шешуші кездесуде Өзбекстан өкілі Арслонбек Тожиевтен басым түсті. Осылайша қазақстандық дзюдошы турнирдің алтын жүлдесін иеленді.
Жарыстың соңғы күнінде Қазақстан құрамасының тағы бірнеше өкілі жүлдеге таласты. 60 келіге дейінгі салмақта Шерзод Давлатов қола медаль үшін белдескенімен, Өзбекстан спортшысы Самариддин Кучкаровқа есе жіберді.
66 келіге дейінгі салмақта Ақылжан Жұбатқанов жұбаныш белдесуінде Оңтүстік Корея өкілі Чанён Киммен кездесіп, жеңіліп қалды.
Әйелдер арасында 78 келіден жоғары салмақта өнер көрсеткен Аида Тойшыбекова да жүлдеге таласу мүмкіндігін пайдалана алмады. Ол жұбаныш белдесуінде Венесуэла өкілі Карен Леоннан жеңілді.
Қазақстан құрамасының бірқатар дзюдошысы жарысты алғашқы кезеңдерде аяқтады. Атап айтқанда, Дана Әбдірова (57 келіге дейін), Талғат Орынбасар (60 келіге дейін), Нұрқанат Серікбаев (66 келіге дейін), Ажар Асхат (70 келіге дейін), Бақытжан Абдурахманов және Аңсарбек Ғайнуллин (73 келіге дейін), Аруна Жангелдина (78 келіге дейін), Әділет Алмат (81 келіге дейін), Айдар Арапов (90 келіге дейін), Марат Байқамуров (100 келіге дейін) және Ерасыл Қажыбаев (100 келіден жоғары) жүлдеге жете алмады.
Осылайша Қазақстан құрамасы Лозаннадағы Grand Slam турнирін бір алтын медальмен аяқтады. Ұлттық құрама қоржынына жалғыз жүлдені Абылайхан Жұбаназар салды.
Айта кетейік, бұған дейін Париж Олимпиадасына қатысқан Данияр Шамшаев Қазақстан чемпионатында жеңімпаз атанған болатын.
