ADYM.KZ /Ұлттық домбыра күніне орай «Астана Опера» мемлекеттік опера және балет театрында «Басты рөлде – Домбыра» атты тақырыптық көрме ұйымдастырылды. Бұл туралы Мәдениет және ақпарат министрлігі хабарлады.
Көрме театрдың фойесінде орналасқан. Оны театрға қойылым көруге келген көрермендер мен экскурсияға қатысатын қонақтар тамашалай алады.
Экспозиция театр шығармашылығындағы домбыраның айрықша орнын көрсетуге арналған. Көрмеде бейнематериалдар мен мұрағаттық құжаттар арқылы ұлттық аспаптың театр өнеріндегі рөлі, сондай-ақ қазақтың дәстүрлі музыкалық мұрасын насихаттаудағы маңызы таныстырылады.
Министрліктің мәліметінше, «Астана Опера» репертуарындағы ұлттық классикалық туындылар мен тарихи қойылымдарда домбыра ерекше көркемдік қызмет атқарады. Атап айтқанда, «Абай», «Қыз Жібек», «Біржан – Сара» және басқа да спектакльдерде ұлттық аспап кейіпкерлердің болмысын тереңірек ашып, дәуірдің рухын жеткізуге әрі сахналық оқиғаны ұлттық құндылықтармен сабақтастыруға мүмкіндік береді.
Көрме келушілерге қазақтың қасиетті қара домбырасының театр өнеріндегі орны мен мәдени мұрадағы маңызын жан-жақты таныстыруды мақсат етеді.
