ADYM.KZ / Нидерланд соңғы 20 жылда Қазақстан экономикасына 124 миллиард доллардан астам тікелей инвестиция салды. Бұл туралы Астанада өткен Қазақстан–Нидерланд Іскерлік кеңесінің II отырысында айтылды.
Іс-шараға екі елдің дипломатиялық өкілдері, Қазақстанның Сыртқы сауда палатасы, БеНиНюкс сауда палатасы және бизнес қауымдастық өкілдері қатысты. Кездесуде сауда-экономикалық және инвестициялық ынтымақтастықтың қазіргі жағдайы талқыланып, әріптестікті одан әрі дамыту бағыттары қарастырылды.
Жиында жарияланған мәліметке сәйкес, 2025 жылы Қазақстан мен Нидерланд арасындағы тауар айналымы 11 пайызға өсіп, 6 миллиард доллардан асты.
Қазіргі таңда Қазақстанда нидерланд капиталының қатысуымен 700-ден астам кәсіпорын жұмыс істейді. Бұл Нидерландтың еліміздің ірі инвестициялық серіктестерінің бірі екенін көрсетеді.
Қазақстанның Сыртқы сауда палатасы Басқарма төрағасының міндетін атқарушы Дана Қасымова екі ел арасындағы экономикалық байланыстардың тұрақты дамып келе жатқанын атап өтті.
Оның айтуынша, Қазақстанның экономикалық әлеуеті мен Нидерландтың инновациялық тәжірибесін ұштастыру жаңа инвестициялық жобаларды жүзеге асыруға және өзара тиімді ынтымақтастықты кеңейтуге мүмкіндік береді.
Қазақстан Нидерландқа негізінен мұнай, ферроқорытпа және титан экспорттайды. Ал Нидерландтан елімізге дәрілік заттар, медициналық жабдықтар, түрлі техника мен ауыл шаруашылығы өнімдері жеткізіледі.
Сарапшылардың пікірінше, сауда көлемінің артуы мен инвестициялық белсенділіктің жоғары деңгейі Қазақстан мен Нидерланд арасындағы стратегиялық экономикалық әріптестіктің нығайып келе жатқанын көрсетеді.
