ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен «Заң мен тәртіп» қағидаты аясында М. Өтебаев атындағы жоғары жаңа технологиялар колледжінде «Буллингке қарсы бір қадам» тақырыбында кездесу өтті.
Іс-шараның негізгі мақсаты – жастар арасында буллингтің алдын алу, құқықтық сауаттылықты арттыру және білім беру ортасында өзара құрмет пен қауіпсіз қарым-қатынас мәдениетін қалыптастыру. Сонымен қатар студенттерге құқықбұзушылықтың салдарын түсіндіріп, заң талаптарын сақтаудың маңызын жеткізу көзделді.
Кездесуге Шымкент қаласы Полиция департаменті Әл-Фараби аудандық полиция басқармасының КҚҚБ бастығы, полиция подполковнигі Ернар Жомартович Кошанов, Әл-Фараби аудандық полиция басқармасы ҚҚБ ЮПТ КТІЖ аға учаскелік полиция инспекторы, полиция майоры Рахымжан Испандиярович Ирисбеков, аталған басқарманың Қоғамдық қауіпсіздік бөлімінің Отбасылық-тұрмыстық зорлық-зомбылыққа қарсы күрес бөлімшесінің инспекторы, полиция капитаны Әсемай Есенқызы Анарбаева және «Жастар ресурстық орталығы» КММ Психологиялық көмек көрсету бөлімінің маманы Үміт Қайсарқызы Қоңрат қатысты.
Кездесу барысында мамандар буллингтің түрлері мен оның адамға тигізетін психологиялық және әлеуметтік әсері туралы түсіндірді. Қорқыту, кемсіту, әдейі шеттету және әлеуметтік желілер арқылы қысым көрсету сияқты әрекеттердің салдарына назар аударылды. Сондай-ақ мұндай жағдайларға бейжай қарамай, дер кезінде көмекке жүгінудің маңыздылығы айтылды.
Полиция өкілдері жастарға құқықбұзушылықтың алдын алу, қоғамдық тәртіпті сақтау және заң талаптарын орындау жөнінде ақпарат берді. Кез келген адамның ар-намысы мен қадір-қасиетін құрметтеу, өз әрекетіне жауапкершілікпен қарау және жанжалдарды күш қолданбай шешу қажеттігі атап өтілді.
Психологиялық көмек көрсету бөлімінің маманы буллингке тап болған немесе оның куәгері болған жағдайда қандай әрекет жасау керектігін түсіндірді. Қиын жағдайды жалғыз шешуге тырыспай, сенімді ересектерге, педагогтерге немесе тиісті мамандарға хабарласу қажеттігі айтылды. Қолдау көрсету мен өзара түсіністікке негізделген орта қалыптастырудың маңызы да қозғалды.
Іс-шара «Заң мен тәртіп» қағидаты аясында жастардың құқықтық мәдениетін қалыптастыруға, құқықбұзушылықтың алдын алуға және қауіпсіз қоғамдық ортаны нығайтуға бағытталды.
Осындай кездесулер жастардың буллингке қатысты түсінігін кеңейтіп, өз құқықтары мен міндеттерін білуіне, сондай-ақ айналасындағыларға құрметпен қарап, жауапты азаматтық ұстаным қалыптастыруына ықпал етеді.
