ADYM.KZ / Қытайдың Гуйян қаласында өткен бокстан Әлем кубогының екінші кезеңінде Қазақстан құрамасы табысты өнер көрсетіп, командалық есепте екінші орынға тұрақтады.
15-21 маусым аралығында ұйымдастырылған жарысқа 44 елден 300-ге жуық боксшы қатысты. Қазақстан атынан сынға түскен спортшылар бес алтын және үш қола медаль жеңіп алып, жалпы есепте үздік үштікке енді.
Қазақстан құрамасына алтын жүлдені Назым Қызайбай (54 келі), Виктория Графеева (60 келі), Санжар Тәшкенбай (50 келі), Абылайхан Жүсіпов (70 келі) және Айбек Оралбай (+90 келі) сыйлады.
Ал қола медальдарды Аида Әбікеева (65 келі), Валерия Аксенова (80 келі) және Дина Исламбекова (+80 келі) еншіледі.
Командалық есепте Қытай құрамасы 5 алтын, 1 күміс және 3 қола медальмен бірінші орын алды. Қазақстан 5 алтын және 3 қола жүлдемен екінші орынға көтерілсе, Өзбекстан 4 алтын, 3 күміс және 4 қола медальмен үздік үштікті түйіндеді.
Осылайша қазақстандық боксшылар әлем кубогының алғашқы кезеңімен салыстырғанда нәтижесін жақсартты. Бұған дейін Бразилияның Фос-ду-Игуасу қаласында өткен турнирде ұлттық құрама 3 алтын, 1 күміс және 3 қола медаль жеңіп алған болатын.
Әлем кубогының финалдық кезеңі қараша айында Өзбекстанда өтеді. Қазіргі уақытта жарыстың нақты өтетін күні мен қабылдайтын қаласы әзірге жарияланған жоқ.
