ADYM.KZ / Астана мен Алматы қалаларында биыл күзде спорт саласындағы бірқатар ірі халықаралық жарыстар мен маңызды жиындар өтеді. Олардың қатарында әлем чемпионаттары, халықаралық спорттық сериялардың кезеңдері, олимпиадалық және паралимпиадалық спорт түрлерінен жарыстар, сондай-ақ Дүниежүзілік допингке қарсы агенттіктің (WADA) басқарушы органдарының отырыстары бар.
Алдағы маңызды спорттық шаралардың бірі – үстел теннисінен Қазақстан Республикасы Президентінің кубогы. Сонымен қатар елімізде күрес түрлерінен әлем чемпионаты және бірқатар беделді халықаралық жарыстар ұйымдастырылады.
Туризм және спорт министрі Ербол Мырзабосыновтың айтуынша, Қазақстанның ірі халықаралық спорттық іс-шараларды қабылдауы халықаралық ұйымдардың елге деген сенімінің жоғары екенін көрсетеді.
«Күзде Қазақстан Президенті кубогы, әлем чемпионаттарынан бастап, ірі халықаралық сериялардың финалдарына дейінгі түрлі спорт түрлерінен жарыстарды қабылдайды. WADA басқарушы органдарының отырыстары мен күрес түрлерінен әлем чемпионаты да маңызды оқиғалардың қатарында. Бұл халықаралық спорт ұйымдарының елімізге деген жоғары сенімін көрсетеді», – деді министр.
Оның айтуынша, халықаралық жарыстарды өткізудегі басты мақсат тек спорттық іс-шараларды ұйымдастырумен шектелмеуі керек. Мұндай бәсекелер қазақстандық спортшылардың өз елінде әлемнің үздік атлеттерімен сынға түсуіне мүмкіндік беріп, отандық мамандардың кәсіби біліктілігін арттыруға, спорт инфрақұрылымын дамытуға және оқиғалық туризмді жандандыруға ықпал етуі тиіс.
Жалпы, 2026 жылы Қазақстанда әлемдік және құрлықтық деңгейдегі 20-ға жуық ірі халықаралық спорт жарысын өткізу жоспарланған.
Халықаралық жарыстардың көбеюі елдің спорттық әлеуетін арттырумен қатар, Қазақстанды шетелдік спортшылар, жанкүйерлер мен туристер үшін тартымды бағыттардың біріне айналдыруға мүмкіндік береді. Сонымен бірге мұндай іс-шаралар қонақүй, қоғамдық тамақтану, көлік және басқа да қызмет көрсету салаларының дамуына серпін береді.
Қазақстанның халықаралық спорттық іс-шараларды қабылдауы 2027 жылы да жалғасады. Келер жылы Астанада спорттың бірнеше түрінен әлем чемпионаттары өтеді.
Атап айтқанда, елордада бокс, дзюдо, таеквондо, үстел теннисі, киберспорт және жасөспірімдер арасындағы шорт-тректен алты әлем чемпионатын өткізу жоспарланған. Бұдан бөлек, Астанада УЕФА-ның 51-конгресі ұйымдастырылады.
Осылайша, Қазақстанның халықаралық спорттық күнтізбедегі орны жыл сайын нығайып келеді. Ірі жарыстарды өткізу ел спортшыларына тәжірибе жинақтауға, спорттық инфрақұрылымды дамытуға және Қазақстанның халықаралық аренадағы имиджін күшейтуге мүмкіндік береді.
