ADYM.KZ / Шымкент қаласында NEET санатындағы жастарды жұмыспен қамту, мемлекеттік қолдау шараларына тарту және қоғам өміріне белсенді араласуына жағдай жасау бағытындағы жұмыстар жалғасуда.
Отбасылық цифрлық картаның (ОЦК) деректерін талдау нәтижесінде қаладағы NEET санатындағы жастар санының төмендеу динамикасы байқалады. Атап айтқанда, 2024 жылы бұл санатқа 12 649 адам енгізілсе, 2025 жылдың қорытындысы бойынша олардың саны 6 932 адамды құраған. 2026 жылдың шілде айында көрсеткіш 6 484 адам болса, қыркүйек айында NEET санатындағы жастар саны 5 805 адамға дейін төмендеді.
Жастардың әлеуметтік және еңбек әлеуетін арттыру мақсатында NEET санатындағы жұмыссыз және жұмыспен қамтылмаған жастармен профилактикалық-түсіндіру жұмыстары жүргізілуде. Осы бағытта Қаратау және Тұран аудандарында мекенжайлық аралау жұмыстары ұйымдастырылды.
Аталған жұмыс барысында мамандар жастардың тұрғылықты мекенжайларына барып, олардың қазіргі әлеуметтік жағдайын зерделеді. Жалпы 40-қа жуық үй араланып, жастарға жұмыспен қамту мүмкіндіктері, мемлекеттік қолдау шаралары, кәсіби бағдар беру және бос жұмыс орындары туралы ақпарат ұсынылды.
Кездесу кезінде жастарға еңбек нарығында сұранысқа ие мамандықтар бойынша кәсіби білім алу, қысқа мерзімді оқыту курстарына қатысу, жұмысқа орналасу және кәсіп бастау мүмкіндіктері жөнінде түсіндірілді. Сонымен қатар жастардың қызығушылығы мен қабілетіне қарай қолайлы жұмыс бағыттарын таңдаудың маңыздылығы айтылды.
Мамандар жұмыс іздеп жүрген жастарға бос жұмыс орындары туралы ақпарат беріп, жұмыспен қамтуға жәрдемдесетін тиісті тетіктерге бағыт-бағдар көрсетті. Қажет болған жағдайда жастарды жұмыспен қамту және әлеуметтік қолдау мәселелері бойынша тиісті мамандарға жүгіну жолдары түсіндірілді.
Мұндай мекенжайлық жұмыстар NEET санатындағы жастарды анықтап қана қоймай, олардың нақты қажеттіліктерін зерделеуге және әр жасқа жеке қолдау көрсетуге мүмкіндік береді. Әсіресе еңбек нарығына енді қадам басқан жастар үшін кәсіби бағдар беру мен жұмысқа орналасу мүмкіндіктері туралы нақты ақпараттың маңызы зор.
Жалпы профилактикалық және түсіндіру жұмыстарының негізгі мақсаты – NEET санатындағы жастарды қоғамдық өмірге белсенді тарту, олардың жұмыспен қамтылуына ықпал ету, кәсіби әлеуетін арттыру және мемлекеттік қолдау шараларымен қамту.
Бұл бағыттағы жұмыстар алдағы уақытта да жалғасып, NEET санатындағы жастардың әлеуметтік және еңбек белсенділігін арттыруға бағытталатын болады.
