Мемлекет басшысы Қасым-Жомарт Тоқаев 22-23 маусым күндері Еуропалық кеңес президенті Антониу Коштаның шақыруымен Брюссельге ресми сапармен барады. Бұл туралы Adym.kz ақпараттық сайты Ақорданың баспасөз қызметіне сілтеме жасап хабарлады.
Сапар аясында Президент Еуропалық кеңес президенті Антониу Кошта және Еуропалық комиссия президенті Урсула фон дер Ляйенмен келіссөздер өткізеді. Кездесулер барысында Қазақстан мен Еуропалық Одақ арасындағы кеңейтілген серіктестік пен ынтымақтастықты одан әрі дамыту мәселелері талқыланады.
Бағдарламаға сондай-ақ Бельгия премьер-министрі Барт де Вевермен кездесу енгізілген.
Сонымен қатар Қасым-Жомарт Тоқаев ірі еуропалық компаниялардың жетекшілері қатысатын «Қазақстан – ЕО» дөңгелек үстелінде сөз сөйлеп, бірқатар екіжақты кездесу өткізеді.
Ресми сапар Қазақстан мен Еуропалық Одақ арасындағы саяси және экономикалық байланыстарды нығайтуға бағытталған маңызды қадамдардың бірі болмақ.
