ADYM.KZ / Ұлттық банк төрағасы Тимур Сүлейменов инфляция деңгейінің төмендеуіне байланысты базалық мөлшерлемені одан әрі қысқарту мүмкіндігіне қатысты пікір білдірді.
Сенаттың жалпы отырысынан кейін журналистердің сұрақтарына жауап берген ол соңғы жылдары инфляциямен күрес бағытында оң нәтижелерге қол жеткізілгенін атап өтті.
«Бір кезеңде инфляция шамамен 30 пайызға дейін жеткен болса, қазір ол 10 пайызға жуықтады. Дегенмен, бұл мәселе бойынша босаңсуға болмайды. Инфляцияны толық жеңдік деп айтуға әлі ерте», – деді Ұлттық банк басшысы.
Оның айтуынша, қазіргі таңда ақша-несие саясатын біртіндеп жұмсартуға мүмкіндік беретін алғышарттар қалыптасып келеді. Соның нәтижесінде Ұлттық банк базалық мөлшерлемені 18 пайыздан 17 пайызға дейін төмендету туралы шешім қабылдаған.
Тимур Сүлейменов мөлшерлеменің бірден 1 пайыздық тармаққа қысқаруын елеулі қадам ретінде бағалады.
«Егер қолайлы экономикалық жағдай сақталса, ақша-несие саясатын жұмсарту бағытын жалғастыруымыз мүмкін. Алайда әлемдік және ішкі нарықтардағы белгісіздіктерді ескере отырып, сақтық таныту қажет», – деді ол.
Еске салайық, 5 маусымда Ұлттық банктің Ақша-кредит саясаты комитеті базалық мөлшерлемені пайыздық дәлізі ±1 пайыздық тармақпен жылдық 17 пайыз деңгейінде белгілеу туралы шешім қабылдаған болатын.
