Президент Қасым-Жомарт Тоқаев Түркі мемлекеттері ұйымына мүше елдердің жоғарғы соттарының екінші конференциясына қатысу үшін Қазақстанға келген сот жүйесінің жетекшілерімен кездесті, деп хабарлайды Adym.kz ақпараттық сайты Ақордаға сілтеме жасап.
Ақордада өткен кездесуге Әзербайжан, Қырғызстан, Түркия және Өзбекстанның жоғары сот органдарының басшылары мен өкілдері қатысты.
Мемлекет басшысы қонақтарға ілтипат білдіріп, бауырлас мемлекеттер арасындағы ынтымақтастықты нығайтуда Түркі мемлекеттері ұйымының маңызы ерекше екенін атап өтті.
Президенттің айтуынша, соңғы жылдары ұйымға мүше елдердің сот және құқық қорғау салаларындағы өзара іс-қимылы жаңа деңгейге көтерілген. Ол Түркістанда өтетін жоғарғы соттар конференциясы осы ынтымақтастықтың нақты көрінісі екенін айтты.
«Әрбір мемлекеттің тұрақты дамуы мен өркендеуі үшін тиімді сот жүйесінің маңызы зор. Сондықтан жоғарғы соттар арасындағы байланысты тереңдету ортақ мүддемізге толық сай келеді», – деді Қасым-Жомарт Тоқаев.
Кездесу барысында Мемлекет басшысы қазіргі жаһандық технологиялық өзгерістер жағдайында сот жүйесін жаңғырту мәселесіне де тоқталды. Оның айтуынша, Түркістанда өтетін конференцияда сот саласын цифрландыру, инвесторлардың құқықтарын қорғау және өзге де өзекті тақырыптар талқыланады.
Президент Қазақстанның Түркі мемлекеттері ұйымы аясындағы барлық бастамаларды қолдайтынын және бұл бағыттағы ынтымақтастықты одан әрі дамытуға мүдделі екенін жеткізді.
Сондай-ақ Қасым-Жомарт Тоқаев қатысушыларға елімізде жүзеге асырылып жатқан ауқымды реформалар туралы ақпарат берді. Мемлекет басшысы Конституциялық өзгерістер, заңнаманы жетілдіру және мемлекеттік басқару жүйесін жаңғырту бағытында атқарылған жұмыстарға тоқталды.
Кездесу соңында Президент сот және құқық қорғау жүйесін реформалау, заң үстемдігін қамтамасыз ету және азаматтардың құқықтарын қорғау бағытындағы бастамалардың маңызын атап өтті.
