ADYM.KZ / Алматыда Disney компаниясының әйгілі «Ойыншықтар хикаясы 5» анимациялық фильмінің жабық көрсетілімі өтті. Әлемге танымал франшизаның жаңа бөлімі енді қазақстандық көрерменге қазақ тілінде жол тартады.
Фильмнің қазақша дубляжының режиссері Шах-Мұрат Ордабаевтың айтуынша, жаңа бөлімде көрермендер сүйікті кейіпкерлерін жаңа қырынан танып, қазіргі қоғамдағы өзекті мәселелерге назар аударады.
Оның сөзінше, туындының негізгі тақырыптарының бірі – цифрландыру дәуіріндегі бала тәрбиесі. Фильмде әлеуметтік желілердің, гаджеттердің және онлайн кеңістіктің балаларға ықпалы көркем түрде баяндалады.
«Бұл франшиза әрдайым заман талабына сай жаңа тақырыптарды көтере біледі. Жаңа бөлімде цифрлық технологиялардың балалар өміріне әсері көрсетіліп, ата-аналар үшін маңызды ойлар ұсынылады», – деді Шах-Мұрат Ордабаев.
Анимациялық фильмді қазақ тілінде дыбыстауға театр және кино актерлері Зарина Кәрмен мен Асан Мәжит және өзге де өнер өкілдері қатысқан.
Айта кетейік, соңғы жылдары Disney студиясы қазақ тіліндегі дубляж жобаларын белсенді қолдап келеді. 2025 жылы компания «Аватар: От пен күл», «Элио», «Лило мен Стич» және «Аңдар шаһары 2» фильмдерін қазақ тіліне аударды.
Бұған дейін де студия «Ойжұмбақ 2», «Моана 2» және «Муфаса. Арыстан патша» фильмдерінің қазақша нұсқаларын әзірлеуге тапсырыс беріп, дубляж жұмыстарына қаржылық қолдау көрсеткен болатын.
Жаңа анимациялық фильмнің қазақ тіліндегі көрсетілімі отандық көрерменнің ана тілінде сапалы контент тұтынуына мүмкіндік береді.
