ADYM.KZ / Қазақстан Жапониямен визалық режимді жеңілдету мәселесі бойынша келіссөздерді жалғастыруда. Бұл туралы Сенат кулуарында Қазақстан Республикасы Сыртқы істер министрінің бірінші орынбасары Ержан Ашықбаев мәлімдеді.
Журналистердің Қазақстан азаматтары үшін Жапонияға визасыз режим енгізудің мерзіміне қатысты сұрағына жауап берген ол бұл бағыттағы жұмыс тұрақты түрде жүргізіліп жатқанын айтты.
Ержан Ашықбаевтың сөзінше, Қазақстан азаматтарының құқықтары мен мүдделерін қорғау, сондай-ақ визалық шектеулерді жеңілдету – сыртқы саясаттың басым бағыттарының бірі. Соңғы жылдары қазақстандық паспорттың халықаралық деңгейдегі беделі артып келеді.
Сонымен қатар ол мұндай келісімдердің тек бір тараптың шешіміне тәуелді емес екенін атап өтті.
«Әр мемлекеттің өз ішкі саяси және экономикалық ұстанымы, шетел азаматтарына қатысты талаптары бар. Сондықтан визалық режимді жеңілдету бойынша келіссөздер уақытты қажет ететін күрделі процесс», – деді министрдің бірінші орынбасары.
Оның айтуынша, Қазақстан тарапы Жапониямен ғана емес, басқа да мемлекеттермен визалық режимді жеңілдету бағытындағы жұмысты жалғастыра береді.
Әзірге Қазақстан азаматтары үшін Жапонияға визасыз режим енгізу туралы нақты шешім қабылданған жоқ. СІМ өкілдері келіссөздер нәтижесі белгілі болған жағдайда бұл туралы қосымша ақпарат берілетінін жеткізді.
Айта кетейік, бұған дейін Мемлекет басшысы Қасым-Жомарт Тоқаев қазақстандықтар үшін шетелдермен визалық рәсімдерді жеңілдету мәселесінің маңызын бірнеше рет атап өткен болатын. Қазіргі таңда Қазақстан азаматтары Жапония аумағына кіру үшін виза рәсімдеуі қажет.
