ADYM.KZ / Шымкентте қала тұрғындары арасында салауатты өмір салтын насихаттау, бұқаралық спортты дамыту және велоспортқа деген қызығушылықты арттыру мақсатында «Шымкент веломарафоны» ұйымдастырылды. Қалалық Дене шынықтыру және спорт басқармасы мұрындық болған шараның ашылу салтанаты «Тәуелсіздік» саябағында өтті. Одан кейін 350-ге жуық қатысушы 20 шақырымдық қашықтықты бағындыру үшін Ипподромға қарай жолға шықты.
Биыл екінші жыл қатарынан ұйымдастырылған веломарафонға әртүрлі жастағы қала тұрғындары қатысты. Қатысушылар арасында велоспорт әуесқойларымен қатар, салауатты өмір салтын ұстанып, бос уақытын белсенді өткізуге ниетті азаматтар да болды. Шара қала тұрғындарына спортпен шұғылданудың маңызын насихаттап қана қоймай, ортақ мақсат аясында бас қосуға мүмкіндік берді.
Жарыстың ашылу салтанатында қалалық Дене шынықтыру және спорт басқармасы басшысының орынбасары Ермек Дәрменов қатысушыларға сәттілік тілеп, веломарафонның ауқымы жыл сайын кеңейіп келе жатқанын атап өтті. Сондай-ақ қалада велоспортты бұқаралық деңгейде дамытуға басымдық беріліп отырғанын жеткізді. Мұндай спорттық шаралар тұрғындардың дене белсенділігін арттырып, жастардың спортқа деген ынтасын оятуға ықпал етеді.
Жарысқа қатысқан жас велошабандоздардың бірі – 14 жастағы Арман Диасұлы. Оның айтуынша, ол «Шымкент веломарафонына» екінші рет қатысып отыр. Жас спортшы биыл да 20 шақырымдық қашықтықты еңсеруге ниетті екенін айтып, алдағы уақытта да осындай жарыстардан тыс қалмайтынын жеткізді.
Веломарафон қатысушыларға өз мүмкіндіктерін сынап, төзімділіктерін шыңдауға жол ашты. Сонымен қатар бұл бастама өскелең ұрпақ арасында спорт мәдениетін қалыптастырып, велосипед тебуді күнделікті өмір салтының бір бөлігіне айналдыруға ынталандырады.
Жарыс қорытындысы бойынша үздік нәтиже көрсеткен қатысушылар медальдармен және алғыс хаттармен марапатталды. Ұйымдастырушылардың мұндай бастамалары Шымкентте бұқаралық спортты дамытуға, тұрғындардың салауатты өмір салтына деген қызығушылығын арттыруға және қаладағы спорттық мәдениетті нығайтуға бағытталған.
