ADYM.KZ / Президент Қасым-Жомарт Тоқаев медицина қызметкерлері күніне арналған салтанатты іс-шарада дәрігерлерді әлеуметтік қолдау шаралары туралы мәлімдеді.
Мемлекет басшысының айтуынша, медицина қызметкерлерін құқықтық тұрғыдан қорғаумен қатар, олардың әлеуметтік жағдайын жақсартуға ерекше көңіл бөлініп келеді.
«Соңғы үш жылда сала мамандарына көрсетілетін мемлекеттік қолдаудың көлемі жеті есе ұлғайды. Медицина қызметкерлерінің жалақысы кезең-кезеңімен өсіп жатыр. Тек биылдың өзінде осы мақсатқа республикалық бюджеттен 33 миллиард теңге бөлінді», – деді Президент.
Қасым-Жомарт Тоқаев қабылданып жатқан шаралардың нәтижесінде денсаулық сақтау саласындағы кадрлық ахуалдың тұрақтанып келе жатқанын атап өтті.
Сонымен қатар Мемлекет басшысы шалғай елді мекендерде еңбек ететін дәрігерлерге көрсетілетін қолдау туралы айтты. Оның сөзінше, ауылдық жерлерге барған медицина мамандарына бір реттік көтерме төлемдер беріледі.
«Өткен жылы 530 дәрігерге жалпы сомасы 4,5 миллиард теңге көлемінде қаржы бөлінді», – деді Президент.
Айта кетейік, бүгін Ақордада Медицина қызметкерлері күніне орай салтанатты жиын өтті. Мемлекет басшысы сала өкілдерін кәсіби мерекемен құттықтап, денсаулық сақтау жүйесін дамыту бағытындағы басым міндеттерге тоқталды.
