ADYM.KZ / Алматы мен Дубай арасында тұрақты жүк әуе қатынасы іске қосылды. Emirates SkyCargo компаниясы 16 маусым күні Дубай – Алматы бағыты бойынша алғашқы жүк рейсін орындады.
Рейске Boeing 777F жүк ұшағы тартылды. Алматы халықаралық әуежайының мәліметінше, алғашқы рейсті орындаған әуе кемесі авиациядағы дәстүр бойынша су доғасымен қарсы алынды. Әуежай қызметкерлері экипаж мүшелерін салтанатты түрде күтіп алып, арнайы тұсаукесер рәсімін өткізді.
Жаңа бағыт бойынша жүк рейстері аптасына бір рет – әр сейсенбі күні орындалады. Компанияның мәліметінше, бұл бағыт арқылы аптасына 100 тоннадан астам жүк тасымалдауға мүмкіндік бар.
Жаңа әуе қатынасы Алматы мен халықаралық нарық арасындағы логистикалық байланысты нығайтып, электроника, тез бұзылатын азық-түлік өнімдері, өнеркәсіптік жабдықтар және түрлі тұтыну тауарларын тиімді әрі үздіксіз жеткізуге жол ашады.
Алматы қаласы Emirates SkyCargo компаниясының Орталық Азиядағы алғашқы жүк бағытына айналып отыр. Бұл өңірдің халықаралық жүк тасымалы жүйесіндегі маңызын арттырып, көлік-логистикалық әлеуетін күшейтуге ықпал етеді.
