Президент Қасым-Жомарт Тоқаев «Самұрық-Қазына» АҚ басқарма төрағасы Нұрлан Жақыповты қабылдады. Кездесу барысында Мемлекет басшысына Қордың биылғы бес айдағы қызметінің қорытындылары мен алдағы кезеңге арналған даму жоспары таныстырылды, деп хабарлайды Adym.kz ақпараттық сайты Ақордаға сілтеме жасап.
Нұрлан Жақыповтың айтуынша, 2025 жылдың қорытындысы бойынша Қордың басқаруындағы активтердің көлемі 88 миллиард долларға жеткен.
Қазіргі таңда елімізде ауқымды инфрақұрылымдық және өнеркәсіптік жобалар жүзеге асырылып жатыр. Биыл жалпы құны 3,3 триллион теңгені құрайтын 16 жобаны іске асыру жоспарланған. Олардың қатарында Мойынты – Қызылжар және Дарбаза – Мақтаарал теміржол желілерінің құрылысы, Қашағандағы газ өңдеу зауыты, Алматыдағы екінші жылу электр орталығын жаңғырту, гибридті электр станциясын салу және Каспий теңізінің табанымен талшықты-оптикалық байланыс желісін тарту жобалары бар.
Қор басшысының сөзінше, бұл бастамалар көлік, энергетика және цифрлық инфрақұрылымды дамытуға, жаңа жұмыс орындарын ашуға және халықтың өмір сүру сапасын жақсартуға мүмкіндік береді.
Сонымен қатар Қор жобалары аясында жыл сайын шамамен 1 миллион қазақстандыққа әлеуметтік қолдау көрсетіледі. «Таза Қазақстан» экологиялық акциясы шеңберінде ел бойынша 5 миллион көшет отырғызу жоспарланған. Ал 2024–2025 жылдары 5,8 миллион ағаш егілген.
Жалпы, 2023–2026 жылдар аралығында құны 856 миллиард теңгені құрайтын 100-ден астам әлеуметтік жоба жүзеге асырылған.
Кездесуде сондай-ақ биыл қазан айында Қосшы қаласында NVIDIA B300 платформасы негізіндегі жаңа суперкомпьютер іске қосылатыны айтылды. Жаңа кластер пайдалануға берілгеннен кейін «Қазақтелеком» компаниясының есептеу қуаты төрт есеге артады. Бұл жасанды интеллект, деректерді өңдеу және жоғары өнімді есептеулер саласындағы ұлттық мүмкіндіктерді кеңейтуге жол ашады.
Кездесу қорытындысында Президент Қасым-Жомарт Тоқаев Қордың негізгі жұмыс бағыттары бойынша, соның ішінде стратегиялық инвестициялық жобаларды уақытылы іске асыру жөнінде бірқатар тапсырма берді.
