Үкімет еліміздегі қала мен ауыл мектептері арасындағы алшақтықты азайту мақсатында ауқымды жұмыстарды жалғастыруда. Биыл елімізде 53 мың орынға арналған 96 жаңа мектеп пайдалануға берілмек. Бұл туралы Adym.kz ақпараттық сайты Үкіметтің баспасөз қызметіне сілтеме жасап хабарлайды.
Мемлекет басшысының тапсырмасы аясында 2020 жылдан бері елімізде 1,2 мыңнан астам мектеп бой көтерді. Бұл қадам келесідей нәтижелерге қол жеткізуге мүмкіндік берді. 1 миллионнан астам жаңа оқушы орны ашылды. Үш ауысымда оқытатын мектептер саны 4 есеге қысқарды. Алдағы үш жылда тағы 1,3 мың мектеп жаңартылады, оның 820-сы ауылдық жерлерде орналасқан. Жөндеуден өткен мектептерде тек қабырғалар ғана емес, пәндік кабинеттер, асханалар, спорт залдары мен қауіпсіздік жүйелері заман талабына сай толық жаңғыртылып жатыр. Сондай-ақ, оқу бағдарламасына цифрлық технологиялар еніп, ерекше білім алуды қажет ететін балаларға арналған инклюзивті бағдарламалар дамытылуда.
Мектепке дейінгі тәрбие саласында да айтарлықтай серпін бар. Қазіргі таңда республика бойынша 12 мыңнан астам мектепке дейінгі ұйым жұмыс істейді (5,3 мыңы мемлекеттік, 6,6 мыңы жекеменшік). Онда 1 миллионнан астам бүлдіршін тәрбиеленуде. Еліміздің 20 қаласы мен 23 ауданында енгізілген ваучерлік қаржыландырудың пилоттық жобасы өз тиімділігін көрсетті. Жоба аясында 936 мыңнан астам ваучер берілді. Балабақшалардағы республикалық кезек соңғы бір жылда 9 есеге дерлік қысқарды. Кезекте тұрған балалар саны 160 мыңнан 18 мыңға дейін азайды.
Соңғы үш жылда балабақшаларда 223 мың жаңа орын ашылса, 2027 жылдың соңына дейін тағы 76,5 мың орын пайдалануға берілмек. Бүгінде бұл сапалы үдерісті 104 мыңнан астам кәсіби маман қамтамасыз етіп отыр. Үкіметтің бұл кешенді қадамдары балалардың ерте жастан бастап қауіпсіз, заманауи әрі жайлы ортада сапалы білім мен тәрбие алуына кепілдік бермек.
