ADYM.KZ / 8-14 маусым аралығында 1403 байланыс орталығы республикалық маңызы бар автожолдарға қатысты 18 мыңнан астам өтінімді қабылдап, өңдеді.
«ҚазАвтоЖол» ұлттық компаниясының мәліметінше, жүргізушілер негізінен ақылы жолдардағы төлем мәселелері, көлік құралдарын эвакуациялау және жол инфрақұрылымына қатысты түрлі сауалдар бойынша хабарласқан.
Апта ішінде интерактивті дауыстық мәзір (IVR) жүйесі арқылы 1 407 өтінім операторлардың қатысуынсыз автоматты түрде өңделді. Сонымен қатар байланыс орталығының мамандары 15 551 телефон қоңырауына жауап беріп, мессенджерлер арқылы келіп түскен 1 191 өтінімді қарастырған.
Ұлттық компанияның хабарлауынша, барлық өтінім белгіленген регламентке сәйкес қаралып, азаматтарға қажетті ақпарат пен консультациялар берілген.
Статистикаға сәйкес, ең көп хабарлама Ақмола, Түркістан және Қарағанды облыстарынан түскен.
«ҚазАвтоЖол» республикалық жолдардағы жағдай туралы жедел ақпарат алу үшін азаматтарға 1403 байланыс орталығына хабарласуға, сондай-ақ компанияның ресми интернет-ресурсын, Telegram-боттарын және WhatsApp мессенджерін пайдалануға болатынын еске салды.
