ADYM.KZ / Маңғыстау облысында әлемге танымал актер Джеки Чанның қатысуымен түсірілетін «Доспехи Бога 4: Ультиматум» халықаралық фильмінің түсірілімі басталды. Жобаны Sәlem Entertainment және Dala Edge Creative Tech Park компаниялары жүзеге асыруда.
Қазіргі уақытта түсірілім тобы өңірдің бірегей табиғи ландшафттарында жұмыс жүргізіп жатыр. Фильмнің негізгі локацияларының бірі ретінде әлемге әйгілі Бозжыра шатқалы таңдалған. 7-12 маусым аралығында бұл аумақта 35 адамнан тұратын түсірілім тобы бірнеше көріністі таспаға түсірді.
Маңғыстау облысының әкімі Нұрдәулет Қилыбай киножоба өкілдерімен кездесіп, халықаралық деңгейдегі түсірілім жұмыстарына жан-жақты қолдау көрсетуге дайын екенін жеткізді.
Кездесу барысында өңірде креативті индустрияны дамыту, кино және телевизиялық жобаларды өндіру, жастарға арналған сапалы медиаконтент қалыптастыру, сондай-ақ Маңғыстаудың туристік және мәдени әлеуетін әлемдік деңгейде таныту мәселелері талқыланды.
«Маңғыстау киноиндустрия саласындағы ірі жобаларды жүзеге асыруға қолайлы өңір. Біз креативті экономиканы дамытуға, мәдени мұраны насихаттауға және туристік тартымдылықты арттыруға бағытталған бастамаларды қолдауға дайынбыз. Мұндай жобалар өңірдің халықаралық деңгейдегі танымалдылығын арттыруға мүмкіндік береді», – деді облыс әкімі.
Әкімдік мәліметінше, халықаралық киножоба отандық киноиндустрия мен туризм саласы үшін маңызды оқиға болмақ. Маңғыстаудың табиғи және тарихи нысандарының фильмде көрсетілуі өңірдің туристік әлеуетін кеңінен танытып, инвестициялық тартымдылығын арттыруға ықпал етеді.
Түсірілім жұмыстары 2026 жылы аяқталады деп жоспарланған. Ал фильмді әлемдік прокатқа шығару 2027 жылдың ақпан айына белгіленген.
