ADYM.KZ / Қазақстан армиясындағы барлық казармаға жасанды интеллект технологиясымен жабдықталған бейнебақылау жүйелері орнатылады. Бұл туралы Қорғаныс министрінің тәрбие және идеологиялық жұмыстар жөніндегі орынбасары Асқар Мұстабеков мәлімдеді.
Оның айтуынша, қазіргі уақытта армиядағы қауіпсіздікті күшейтуге бағытталған кешенді жоспар жүзеге асырылып жатыр. Соның аясында әскери бөлімдердегі казармалар заманауи бақылау жүйелерімен кезең-кезеңімен жабдықталады.
«Менің ойымша, биылғы жылдың соңына дейін және келесі жылы барлық казармаларды жасанды интеллект негізіндегі бейнебақылау жүйелерімен толық қамтимыз. Бұл жүйе түрлі оқиғаларды талдап, сараптама жүргізуге мүмкіндік береді», – деді Асқар Мұстабеков брифинг барысында.
Министр орынбасарының сөзінше, жаңа технологиялар әскери бөлімдердегі қауіпсіздікті арттыруға және құқықбұзушылықтардың алдын алуға ықпал етеді.
Брифинг кезінде журналистер Асқар Мұстабековтен өз ұлының әскери қызмет өткеріп жүрген-жүрмегенін де сұрады. Ол ұлының қазіргі уақытта шекара қызметінде әскери борышын өтеп жатқанын айтты.
«Бір ұлым қазір шекара әскерлерінде қызмет етіп жүр», – деді ол.
Сондай-ақ журналистің ұлының әскери қызметке қатысты шағымдары бар-жоғы туралы сауалына министр орынбасары теріс жауап берді.
«Жоқ, шағымданбайды. Кейін келісімшарт бойынша әскери қызметте қалмақ. Бұл – оның өз шешімі», – деді Асқар Мұстабеков.
