Мемлекет басшысы Қасым-Жомарт Тоқаев Премьер-министрдің орынбасары Қанат Бозымбаевты қабылдады. Кездесу барысында Президентке Қытай Халық Республикасында өткен Alatau City Roadshow халықаралық таныстырылымының қорытындылары туралы баяндалды, деп хабарлайды Adym.kz ақпараттық сайты Ақордаға сілтеме жасап.
Қанат Бозымбаевтың айтуынша, роуд-шоу аясында 20-дан астам іс-шара мен бірқатар кездесу ұйымдастырылған. Нәтижесінде жалпы құны 6,4 миллиард долларды құрайтын 30 келісім мен меморандумға қол қойылды.
Сондай-ақ Шэньчжэнь қаласының мэрі Цинь Вэйчжунмен, Гонконг арнайы әкімшілік ауданының басшысы Джон Лимен және жетекші халықаралық компаниялардың басшыларымен кездесулер барысында Алатау қаласының инвестициялық әлеуеті таныстырылған.
Вице-премьер Мемлекет басшысының Алматы облысына жұмыс сапары кезінде берген тапсырмалары негізінде әзірленген іс-қимыл жоспары туралы да ақпарат берді. Бұдан бөлек, су ресурстары саласындағы жобалардың жүзеге асырылуы, гидротехникалық нысандарды жаңғырту, жаңа су қоймалары мен каналдар салу жұмыстары жөнінде есеп таныстырылды.
Кездесуде «Энергетикалық және коммуналдық секторларды жаңғырту» ұлттық жобасының іске асырылу барысы да қаралды. Биыл тұрғын үй-коммуналдық шаруашылық инфрақұрылымын жаңартуға 1,1 триллион теңгеден астам қаржы бөлінеді. Бұл – тәуелсіздік жылдарындағы салаға бағытталған ең ірі қаржыландыру көлемі.
Жоба отандық және халықаралық қаржы институттарының қолдауымен жүзеге асырылады. Нәтижесінде алдағы үш жыл ішінде коммуналдық желілердің тозу деңгейін 40 пайызға дейін төмендету көзделіп отыр.
Кездесу қорытындысында Президент энергетикалық және коммуналдық инфрақұрылымды жаңғырту жобаларына отандық тауар өндірушілерді кеңінен тартудың маңызын атап өтті. Сонымен қатар оңтүстік өңірлердегі вегетациялық кезеңнің өтуін ерекше бақылауда ұстауды тапсырды.
Мемлекет басшысы Алатау қаласын дамытудың орнықты моделін қалыптастыру, халықаралық капитал мен инновацияларды тартуға қолайлы жағдай жасау қажеттігіне тоқталып, Үкіметке қаланың инфрақұрылымын дамытуға қажетті қаржыны бөлуді тапсырды.
