ADYM.KZ / Қазақстан Жазушылар одағы мен Мәдениет және ақпарат министрлігінің бірлескен «Жаңа Қазақстанның әдеби-танымдық панорамасы» жобасына қатысу үшін өтінім қабылдау басталды.
2024 жылдан бері жүзеге асырылып келе жатқан жоба биыл да жас қаламгерлерді қолдауды жалғастырады. Бастамаға еліміздің барлық өңірінде тұратын 18-35 жас аралығындағы шығармашылық жастар қатыса алады. Үміткерлердің Қазақстан Жазушылар одағының мүшесі болуы міндетті емес.
Ұйымдастырушылардың мәліметінше, жобаның негізгі мақсаты – жас авторларға қолдау көрсету, өңірлердің тарихы мен мәдени мұрасын қазіргі заманмен сабақтастыра отырып, Қазақстанның әдеби-танымдық панорамасын қалыптастыру.
Іріктеуден өткен қатысушылар арнайы комиссияның шешімімен еліміздің әртүрлі өңірлеріне шығармашылық іссапарларға жіберіледі. Сапар барысында қаламгерлер жергілікті тарихпен, мәдениетпен және өңірлердің бүгінгі тыныс-тіршілігімен танысып, болашақ шығармаларына қажетті материал жинайды.
Жоба аясында қатысушылардың жол шығындары мен қаламақысы төленеді. Сонымен қатар, сапар нәтижесінде жазылған шығармалар жинақталып, кітап болып басылып шығады.
Қатысушыларды іріктеу кезінде Қазақстан Жазушылар одағы жанынан құрылған комиссия талапкерлердің шығармашылық өмірбаянын, жарық көрген кітаптарын, марапаттары мен өзге де жетістіктерін ескереді.
Жобаға қатысу үшін үміткерлер мынадай құжаттарды ұсынуы қажет:
– өтінім;
– шығармашылық өмірбаян;
– белгілі қаламгердің немесе Қазақстан Жазушылар одағының өңірлік өкілінің ұсыным хаты.
Құжаттар 1 шілдеге дейін Алматы қаласы, Абылай хан даңғылы, 105-үй, 26-кабинет мекенжайында немесе jazushylar_odagy@mail.ru электрондық поштасы арқылы қабылданады.
