ADYM.KZ / Шымкент қалалық көпбейінді онкологиялық орталығында алғаш рет ұйқыбезінің қатерлі ісігіне шалдыққан пациенттерге лапароскопиялық панкреатодуоденалды операция сәтті жасалды. Бұл онкохирургия саласындағы ең күрделі әрі жоғары технологиялық хирургиялық араласулардың бірі саналады.
Денсаулық сақтау министрлігінің мәліметінше, өңірде заманауи әдісті енгізу мақсатында Астанадағы Ұлттық ғылыми медицина орталығының тәжірибелі онкохирургтері Шымкентке келіп, жергілікті дәрігерлерге арналған арнайы мастер-класс өткізген.
Лапароскопиялық панкреатодуоденалды операцияның басты ерекшелігі – үлкен тілік жасалмайтынында. Хирургиялық араласу арнайы лапароскопиялық құралдардың көмегімен бірнеше шағын тесу арқылы жүзеге асырылады. Бұл әдіс ісікті дәл әрі қауіпсіз алып тастауға, операциядан кейінгі ауырсынуды азайтуға және науқастың тезірек қалпына келуіне мүмкіндік береді.
Мастер-класс аясында ұйқыбезі мен оған жақын орналасқан ағзалардың қатерлі ісігі анықталған үш пациентке осындай операция жасалды.
Мамандардың айтуынша, тәжірибе алмасу жергілікті дәрігерлердің кәсіби деңгейін арттырып қана қоймай, болашақта Шымкентте жоғары технологиялық күрделі операцияларды тұрақты түрде жүргізуге жол ашады.
Нәтижесінде қала тұрғындары күрделі медициналық көмек алу үшін басқа өңірлерге бармай-ақ, өз өңірінде жоғары деңгейдегі мамандандырылған емге қол жеткізе алады. Бұл онкологиялық көмектің қолжетімділігін арттырып, пациенттердің уақытылы әрі сапалы ем алуына мүмкіндік береді.
