ADYM.KZ / Бүгін 2026/27 жылғы маусымдағы UEFA Чемпиондар лигасы мен Конференция лигасының бірінші іріктеу кезеңіне жеребе тартылады.
Еурокубоктық маусымда Қазақстан атынан төрт клуб өнер көрсетеді. Алматылық «Қайрат» Чемпиондар лигасының іріктеу кезеңінде бақ сынаса, «Астана» мен «Елімай» Конференция лигасының бірінші кезеңінен жарысқа қосылады. Ал қостанайлық «Тобыл» турнирді екінші іріктеу кезеңінен бастайды.
Жеребе тарту рәсімі Қазақстан уақытымен сағат 19:00-де басталып, Швейцарияның Ньон қаласында өтеді.
Алдын ала мәлімет бойынша, «Қайраттың» ықтимал қарсыластары қатарында Болгарияның «Левски», Литваның «Кауно Жальгирис», Черногорияның «Сутьеска», Мажарстанның «Дьёри ЭТО», Албанияның «Эгнатия», Беларусьтің «Макслайн» және Люксембургтің «Атерт-Биссен» клубтары бар.
Конференция лигасында «Елімайға» Молдованың «Милсами», Литваның «Жальгирис», Әзербайжанның «Зиря», Арменияның «Алашкерт» немесе Беларусьтің БАТЭ клубтары қарсылас атануы мүмкін.
Ал «Астананың» ықтимал қарсыластары қатарында Солтүстік Македонияның «Силекс», Албанияның «Динамо Сити», Сан-Мариноның «Виртус», Черногорияның «Морнар» және Мальтаның «Марсашлокк» командалары бар.
Чемпиондар лигасының бірінші іріктеу кезеңіндегі кездесулер 7-8 және 14-15 шілдеде өтеді. Ал Конференция лигасының алғашқы матчтары 9 шілдеге, қарымта ойындары 16 шілдеге жоспарланған.
Бүгінгі жеребе қорытындысы бойынша қазақстандық клубтардың еурокубоктардағы алғашқы қарсыластары анықталады.
