ADYM.KZ / Ақмола облысында тауық жұмыртқасын терең өңдеуге арналған ірі өндірістік кешеннің құрылысы жүріп жатыр. Жобаны «Kaz Eggs» ЖШС жүзеге асыруда.
ҚР Ауыл шаруашылығы министрлігінің мәліметінше, кәсіпорын Целиноград ауданының Ақмол ауылында орналасады. Болашақ кешеннің өндірістік қуаты тәулігіне 1 миллион жұмыртқаны құрайды.
Жобаның жалпы инвестициялық құны – 30 млрд теңге. Кәсіпорынды іске қосу 2027 жылдың төртінші тоқсанына жоспарланған. Нәтижесінде өңірде 80 жаңа жұмыс орны ашылады.
Министрлік бұл жобаны отандық өңдеу өнеркәсібін дамытудағы маңызды қадам ретінде бағалап отыр. Кешен жоғары қосылған құны бар өнімдер өндірісін ұлғайтуға және агроөнеркәсіптік кешеннің әлеуетін арттыруға мүмкіндік береді.
Ведомствоның хабарлауынша, ауыл шаруашылығы шикізатын өңдеуді дамыту Қазақстанның агроөнеркәсіптік кешеніндегі басым бағыттардың бірі болып саналады.
«Осы ретте министрлік заманауи өндірістерді құруға, отандық өнімнің бәсекеге қабілеттілігін арттыруға және елдің азық-түлік қауіпсіздігін нығайтуға бағытталған инвестициялық жобаларға жүйелі түрде қолдау көрсетіп келеді», – делінген министрлік хабарламасында.
