ADYM.KZ / 2026 жылғы футболдан әлем чемпионаты матчтарына билеттердің қымбаттауы Мексика билігінің сынына ұшырады. Ел президенті Клаудия Шейнбаум FIFA-ны баға саясатын қайта қарап, турнирді жанкүйерлер үшін қолжетімді етуге шақырды.
Associated Press агенттігінің мәліметінше, әлем чемпионатының кейбір билеттерінің құны 32 970 АҚШ долларына дейін жеткен. Ал қайта сату нарығында жекелеген билеттердің бағасы 2,3 миллион долларға дейін көтерілген.
Клаудия Шейнбаум мұндай бағалар көптеген жанкүйердің әлемдік додаға қатысу мүмкіндігін шектейтінін айтты.
– Футбол басқаша болуы керек. Бұл FIFA ішінде де ойланатын мәселе, – деді Мексика президенті.
Оның пікірінше, футбол әлемдегі адамдарды біріктіретін спорт болғандықтан, матчтарды тамашалау мүмкіндігі баршаға қолжетімді болуы тиіс.
2026 жылғы әлем чемпионаты АҚШ, Канада және Мексикада өтеді. Турнир матчтарына билеттердің бастапқы бағасы 140 доллардан 8 680 долларға дейін белгіленген. Кейін кейбір санаттағы билеттер арзандағанымен, сұранысы жоғары ойындардағы бағалар айтарлықтай өскен.
Ең қымбат билеттер әлем чемпионатының финалдық кездесуіне тиесілі. Олардың ресми бағасы 32 970 долларға дейін жетсе, қайта сату платформаларында бұл көрсеткіш бірнеше есе артқан.
Шейнбаум коммерциялық модельдің спорт индустриясындағы қалыпты құбылыс екенін мойындағанымен, спорт тек қаржылық мүмкіндігі жоғары адамдарға арналған кеңістікке айналмауы керектігін атап өтті.
Әзірге FIFA Мексика президентінің мәлімдемесіне ресми жауап берген жоқ. Ал ұйым президенті Джанни Инфантино бұған дейін билет бағалары Солтүстік Америка нарығының ерекшеліктеріне сәйкес қалыптасқанын айтқан.
Айта кетейік, Football Supporters Europe халықаралық жанкүйерлер ұйымының дерегіне сәйкес, АҚШ-та өтетін әлем чемпионаты матчтарының билеттері 2022 жылы Қатарда өткен мундиальмен салыстырғанда шамамен бес есе қымбаттаған.
