2026 жылы Қазақстанда әлемдік және құрлықтық деңгейдегі 20-ға жуық ірі халықаралық спорт жарысы өтеді. Ауқымды спорттық іс-шаралар Астана, Алматы және Түркістан қалаларында ұйымдастырылады.
Ресми мәліметке сәйкес, жарыстар бағдарламасына олимпиадалық, паралимпиадалық және инновациялық спорт түрлері енгізілген. Келер жылғы басты халықаралық додалардың қатарында дзюдодан Гранд-слам турнирі, стенд атудан ISSF Әлем кубогы, пара каноэден Азия чемпионаты, боччадан Әлем кубогы, каратэден Азия чемпионаты және таеквондодан (WT) Финалдық Гран-при бар.
2026 жылдың ең ірі жарыстарының бірі – 29 шілде мен 9 тамыз аралығында Астанада өтетін «Болашақ ойындары» халықаралық мультиспорттық турнирі. Жоба дәстүрлі спорт пен цифрлық технологияларды ұштастыратын фиджитал спорт түрлерін дамытуға бағытталған.
Сонымен қатар елімізде велотректен Silk Way Series және Astana Open Series халықаралық жарыстары, жеңіл атлетикадан Ғұсман Қосанов мемориалы, джиу-джитсудан Азия чемпионаты, үстел теннисінен Қазақстан Республикасы Президентінің Ашық кубогы, мәнерлеп сырғанаудан Denis Ten Memorial Challenge Series турнирі және өзге де беделді жарыстар ұйымдастырылады.
Бұдан бөлек, Астанада жүзуден Әлем кубогының кезеңі, голболдан жастар арасындағы әлем чемпионаты және параспорт бағытындағы бірнеше халықаралық турнир өткізу жоспарланған.
Мамандардың пікірінше, мұндай халықаралық жарыстар елдің спорттық беделін арттырып қана қоймай, спорттық туризмді дамытуға, инвестиция тартуға және спорт инфрақұрылымын жетілдіруге ықпал етеді.
Сондай-ақ 2027 жыл да Қазақстан спорты үшін маңызды кезең болмақ. Алдын ала жоспарға сәйкес, елімізде 7 әлем чемпионаты, 2 Азия чемпионаты және 19 жасқа дейінгі жасөспірімдер арасындағы футзалдан Еуропа чемпионаты өтеді.
Айта кетейік, биыл тамыз айында Астанада боччадан әлемдік рейтингтік турнир – Astana 2026 World Boccia Cup ұйымдастырылады.
