ADYM.KZ / Лондонда Еуропадағы ең құнды жеке өнер топтамаларының бірінің көрмесі ашылды. Sotheby’s аукцион үйі британдық миллиардер әрі «Тоттенхэм Хотспур» футбол клубының бұрынғы иесі Джо Льюистің отбасылық коллекциясындағы өнер туындыларын көпшілік назарына ұсынды. Жинақтың жалпы құны 270 миллион доллардан асады.
Көрмеге ХХ ғасырдың көрнекті суретшілері мен мүсіншілерінің 48 туындысы қойылған. Олардың қатарында Амедео Модильяни, Густав Климт, Пабло Пикассо, Эдгар Дега және Люсьен Фрейдтің еңбектері бар.
Sotheby’s мәліметінше, бұл – Еуропада бір адамның иелігіндегі аукционға шығарылған ең қымбат өнер коллекциясы.
Аукционның басты лоты ретінде Амедео Модильянидің 1917 жылы салған «Nu assis au collier» картинасы ұсынылды. Сарапшылар туындының құны 61 миллион доллардан асуы мүмкін екенін айтады. Картина соңғы рет 1995 жылы саудаға шығарылған.
Өнертанушылардың пікірінше, бұл жұмысқа деген қызығушылық оның ерекше тарихымен байланысты. Аталған картина Модильянидің Париждегі көзі тірісінде өткен жалғыз жеке көрмесінде қойылған. Сол кездегі көрме қоғамда үлкен резонанс туғызып, көп ұзамай полицияның шешімімен жабылған болатын.
Сондай-ақ аукционға Густав Климттің «Portrait of Gertrud Loew» портреті, Эдгар Деганың «Petite danseuse de quatorze ans» қола мүсіні және Пабло Пикассоның музасы Дора Маарға арналған «Buste de femme» картинасы қойылды.
Мамандар Люсьен Фрейдтің «Sleeping by the Lion Carpet» туындысына да ерекше қызығушылық танытып отыр. Sotheby’s Еуропалық бөлімінің төрағасы Оливер Баркер бұл жұмысты соңғы жылдары нарыққа шыққан ең үздік картиналардың бірі деп бағалады.
89 жастағы Джо Льюистің байлығы шамамен 7,8 миллиард долларға бағаланады. Ол ұзақ жылдар бойы «Тоттенхэм Хотспур» клубының иесі болып, әлемдегі ең ірі жеке өнер коллекцияларының бірін қалыптастырған.
Көрме Лондондағы Sotheby’s кеңсесінде 23 маусымға дейін жалғасады. Келушілер экспозицияны тегін тамашалай алады.
Айта кетейік, бұған дейін футбол аңызы Пеленің 1958 жылғы әлем чемпионатының финалында киген жейдесі 6 миллион долларға бағаланып, аукционға шығарылғаны хабарланған еді.
