ADYM.KZ / 25 қазан – Республика күніне орай Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен Оңтүстік Қазақстан гуманитарлық-экономикалық колледжінде жастармен кездесу өтті. Іс-шараның мақсаты – жастардың құқықтық сауаттылығын арттыру, сыбайлас жемқорлықтың алдын алу және қоғамда адалдық пен әділдік қағидаттарын нығайту.
Кездесуге Шымкент қаласы Әділет департаментінің бас маманы Самал Бахтыяр, Адам құқықтары жөніндегі ұлттық орталықтың Шымкент қаласы бойынша өкілінің маманы Мырзабай Нұрлан Альжанұлы және Жастар ресурстық орталығының инспекторы Әбдразақ Әсел Наралықызы қатысты. Мамандар жастарға заң талаптарын сақтау, азаматтардың құқықтары мен міндеттері, сондай-ақ сыбайлас жемқорлыққа қарсы мәдениетті қалыптастырудың маңызы жөнінде түсіндірме жұмыстарын жүргізді.
Кездесу барысында сыбайлас жемқорлықтың қоғам дамуына тигізетін кері әсері, оның алдын алудағы азаматтық жауапкершілік және заң талаптарын мүлтіксіз орындаудың маңызы сөз болды. Қатысушылар адалдық, ашықтық пен әділдік қағидаттарын күнделікті өмірде ұстану әр азаматтың міндеті екенін атап өтті.
Сонымен қатар жастарға өз құқықтарын білу, заңсыз әрекеттерге жол бермеу және құқықтары бұзылған жағдайда тиісті органдарға жүгіну жолдары түсіндірілді. Құқықтық сауаттылықты арттырудың маңызына тоқталған мамандар жастарды кез келген жағдайда заң аясында әрекет етуге, өз ұстанымдарын құқықтық тұрғыдан сауатты қорғауға шақырды.
Ашық форматта өткен кездесуде жастар өздерін толғандырған сұрақтарын қойып, мамандардан нақты жауаптар алды. Пікір алмасу барысында құқықтық мәдениетті қалыптастыруда білім беру ұйымдарының, мемлекеттік органдардың және жастардың өзара ынтымақтастығы маңызды екені айтылды.
Мұндай кездесулер өскелең ұрпақтың заңға құрметін арттырып, сыбайлас жемқорлыққа қарсы санасын қалыптастыруға ықпал етеді. Сонымен қатар жастардың азаматтық жауапкершілігін нығайтып, қоғамда адалдық пен әділдік құндылықтарын орнықтыруға бағытталған.
