ADYM.KZ / Қазақстанда жүргізілген «Заңсыз келуші» жедел-профилактикалық іс-шарасы барысында көші-қон заңнамасын бұзудың 13 мыңнан астам дерегі анықталды. Бұл туралы Ішкі істер министрлігі хабарлады.
Ведомство мәліметінше, іс-шараның мақсаты – көші-қон заңнамасының сақталуын бақылау, заңсыз көші-қонның алдын алу және қоғамдық тәртіпті қамтамасыз ету.
Рейд барысында полиция қызметкерлері шетел азаматтары тұратын мекенжайларды, құрылыс нысандарын, базарларды, түрлі ұйымдарды және шетелдік жұмыс күшін пайдаланатын жұмыс берушілерді тексерді. Сондай-ақ тұрғындарға шетел азаматтарын тіркеу тәртібі мен заңсыз еңбек күшін пайдаланғаны үшін қарастырылған жауапкершілік туралы түсіндіру жұмыстары жүргізілді.
Нәтижесінде көші-қон заңнамасын бұзуға байланысты 13 035 құқық бұзушылық анықталды. Оның ішінде 9 359 шетел азаматы Қазақстанда болу қағидаларын бұзғаны үшін әкімшілік жауапкершілікке тартылса, 3 828 адам еңбек қызметін заңсыз жүзеге асырғаны үшін жауапқа тартылған.
Сонымен қатар 882 жұмыс беруші шетелдік жұмыс күшін заңсыз пайдаланғаны үшін жауапкершілікке тартылды. Ал 2 794 жеке және заңды тұлға өздерінде тұрып жатқан шетелдіктер туралы полицияға уақытылы хабарламағаны үшін жазаланды.
Сот шешімімен көші-қон талаптарын бұзған 1 559 шетел азаматы елден шығарылды. Бұдан бөлек, 1 836 адамның Қазақстанда болу мерзімі қысқартылды. Оның ішінде 122 азамат мәжбүрлі түрде елден шығарылып, оларға бес жылға дейін Қазақстанға кіруге тыйым салынды.
ІІМ дерегіне сәйкес, елге заңсыз кірген 14 шетел азаматы анықталған. Қазіргі уақытта бұл фактілер бойынша Шекара қызметімен бірлескен тергеу жүргізілуде.
Сондай-ақ халықаралық іздеуде жүрген және өз елдерінің құқық қорғау органдарынан жасырынған 21 шетел азаматы ұсталды.
Министрлік өкілдерінің айтуынша, анықталған заң бұзушылықтардың бір бөлігіне Қазақстан азаматтарының өздері де ықпал еткен. Кейбір азаматтар пайда табу мақсатында шетелдіктердің елге заңсыз кіруіне немесе жұмысқа орналасуына көмектескен.
Мәселен, Атырау облысында шетел азаматтарын Қазақстан арқылы көрші мемлекетке заңсыз өткізуді ұйымдастырды деген күдікпен жергілікті тұрғын ұсталды. Осындай фактілер Жамбыл және Павлодар облыстарында да тіркелген.
Ал Ақтөбе облысындағы құрылыс нысандарының бірінде заңсыз еңбек еткен 60-қа жуық шетел азаматы анықталды. Астанада жұмыс берушінің Африка елдерінен келген алты азаматты заңсыз жұмысқа тартқаны белгілі болды.
Бұдан басқа Алматы және Шымкент қалаларында, сондай-ақ Қарағанды, Алматы, Атырау, Маңғыстау, Шығыс Қазақстан, Қостанай және Солтүстік Қазақстан облыстарында шетелдік жұмыс күшін заңсыз пайдалану фактілері тіркелген.
ІІМ мәліметінше, барлық құқық бұзушылар мен олардың жұмыс берушілері қолданыстағы заңнамаға сәйкес жауапкершілікке тартылған. Сонымен қатар бір жыл ішінде шетелдік жұмыс күшін тарту қағидаларын екі және одан да көп рет бұзған бес жұмыс берушіге қатысты қылмыстық тергеу басталды. Мұндай жағдайлар Жамбыл, Қарағанды және Атырау облыстарында, сондай-ақ Шымкент қаласында анықталған.
Министрлік көші-қон заңнамасының сақталуын бақылау және заңсыз көші-қонның алдын алу бағытындағы жұмыстар алдағы уақытта да жалғасатынын мәлімдеді.
