ADYM.KZ / Қызылорда облысы бойынша Экономикалық тергеп-тексеру департаменті жыл басынан бергі қызметінің қорытындысын жариялады. Ведомство мәліметінше, өңірде тіркелген экономикалық қылмыстық істердің саны өткен жылмен салыстырғанда азайған.
Жыл басынан бері департамент өндірісінде 29 қылмыстық іс болған. Оның 14-і аяқталып, 13 іс сотқа жолданды. Сондай-ақ мемлекет пен азаматтарға келтірілген залалдың басым бөлігі өндірілді.
Департамент басшысының орынбасары Руслан Сатыбалдиевтің айтуынша, қылмыстық процестерді цифрландыру жұмыстары жалғасуда. Соның нәтижесінде биылғы істердің негізгі бөлігі электронды форматта жүргізілген.
Ведомство қызметі тек құқықбұзушылықтарды анықтаумен шектелмейді. Департамент экономикалық және қаржылық құқықбұзушылықтардың алдын алу, тұрғындардың қаржылық сауаттылығын арттыру және қоғамда заң талаптарын сақтау мәдениетін қалыптастыру бағытында да жүйелі жұмыс жүргізіп келеді.
Жыл басынан бері осы бағытта 22 профилактикалық іс-шара ұйымдастырылып, оған 3 мыңнан астам тұрғын қатысты. Кездесулер барысында мектеп оқушылары мен студенттерге дропперлік, қаржы пирамидалары, лудомания, кибербуллинг, ақпараттық гигиена және жасанды интеллектіні қауіпсіз пайдалану тақырыптары бойынша түсіндіру жұмыстары жүргізілді.
Айта кетейік, өткен жылы Қызылорда облысы бойынша Экономикалық тергеп-тексеру департаментінің өндірісінде 61 қылмыстық іс болған.
