ADYM.KZ / Астанада қала тұрғындарына арналған ашық аспан астындағы тегін йога сабақтары басталды. Жоба елордадағы Орталық саябақта ұйымдастырылып, салауатты өмір салтын насихаттауға бағытталған.
Іс-шара Астана қаласы әкімдігінің қолдауымен және қалалық Дене шынықтыру және спорт басқармасының ұйымдастыруымен өтті. Алғашқы жаттығуға 40-тан астам адам қатысты.
Қатысушылар тәжірибелі нұсқаушылардың жетекшілігімен дене дайындығын жақсартуға және жалпы денсаулықты нығайтуға арналған жаттығулар орындады.
Астана қаласы әкімдігінің Спорттық-бұқаралық іс-шараларды өткізу дирекциясы басшысының орынбасары Ержігіт Өсербайдың айтуынша, жобаның негізгі мақсаты – тұрғындар арасында салауатты өмір салтын қалыптастыру.
«Салауатты ұлт – ел болашағының кепілі. Сондықтан мұндай бастамалар тұрғындардың денсаулығын нығайтып қана қоймай, бұқаралық спортты дамытуға да ықпал етеді. Бұл жоба биыл екінші рет ұйымдастырылып отыр», – деді ол.
Ұйымдастырушылардың мәліметінше, тегін йога сабақтары жаз бойы жалғасады. Үш айға жоспарланған жобаға қала тұрғындарының барлығы қатыса алады.
