ADYM.KZ / Жаз мезгілінің басталуымен елорда көшелерінде электросамокат пайдаланушылар саны күрт артты. Осыған байланысты Астана қаласының полициясы жол қозғалысы ережелерін бұзудың алдын алу мақсатында рейдтік және профилактикалық шараларды күшейтті.
Полиция департаментінің мәліметінше, жыл басынан бері электросамокат жүргізушілері тарапынан жасалған 1200-ден астам құқықбұзушылық тіркелген.
Тәртіп сақшыларының айтуынша, азаматтардың бір бөлігі жол қозғалысы ережелерін сақтамай, өздерінің де, өзгенің де қауіпсіздігіне қатер төндіріп отыр. Соңғы рейдтердің бірінде көлік қозғалысы қарқынды жолда бір электросамокатпен жүрген екі жасөспірім анықталған. Ережені бірнеше мәрте бұзған 16 жастағы жасөспірімге қатысты әкімшілік хаттама толтырылып, оның заңды өкілдері де жауапкершілікке тартылған.
Полиция электросамокатпен жүру кезінде бір көлікке екі адамның мінуіне, қозғалыс барысында телефон немесе құлаққап қолдануға, жылдамдықты асыруға және қауіпті маневр жасауға тыйым салынатынын еске салды. Сондай-ақ жаяу жүргіншілер өткелінен өтерде жүргізуші самокаттан түсіп, оны жаяу алып жүруге міндетті.
Қолданыстағы талаптарға сәйкес, электросамокаттармен веложолақтарда немесе велосипед жолақтарында жүруге рұқсат етіледі. Ал мұндай инфрақұрылым болмаған жағдайда қозғалыс жолдың оң жақ шетімен жүзеге асырылуы тиіс. Бұл ретте жүргізушінің жасы 18-ден асқан болуы, кез келген санаттағы жүргізуші куәлігі болуы, қорғаныш шлемін киюі және қараңғы уақытта жарық шағылыстыратын элементтерді пайдалануы қажет.
Сонымен қатар жалға берілетін самокаттарды рұқсат етілмеген орындарға қалдыру деректері де жиілеген. Тротуарларда, аялдамаларда және жаяу жүргіншілер өткелдерінде тасталған самокаттар азаматтардың қозғалысына кедергі келтіретіндіктен, олар арнайы эвакуация қызметтері арқылы коммуналдық айып тұрағына жеткізіледі.
Астана қаласының Полиция департаменті тұрғындарды жол қозғалысы ережелерін қатаң сақтауға шақырып, жолдағы қауіпсіздік әрбір қатысушының жауапкершілігіне байланысты екенін ескертті.
