ADYM.KZ / 2028 жылы Қытай астанасы Бейжің қысқы спорт түрлері бойынша бірден төрт әлем чемпионатын қабылдайды. Мұндай формат Халықаралық конькишілер одағының (ISU) тарихында алғаш рет жүзеге асырылмақ.
Ұлттық олимпиадалық комитеттің мәліметінше, ISU Испанияның Тенерифе қаласында өтіп жатқан Конгресі аясында BEIJING28 атты жаңа жобаның іске қосылғанын жариялады. Жоба аясында мәнерлеп сырғанау, конькимен жүгіру спорты, шорт-трек және синхронды сырғанау бойынша әлем чемпионаттары бір қалада және бір спорттық бағдарлама шеңберінде ұйымдастырылады.
Халықаралық федерацияның бағалауынша, мұндай бастама спортшыларды, жанкүйерлерді, бұқаралық ақпарат құралдарын және серіктестерді біріктіріп, қысқы спорт түрлерінің танымалдылығын арттыруға мүмкіндік береді.
Әлемдік дода Бейжіңдегі Олимпиада мұрасын құрайтын негізгі спорт нысандарында өтеді. Атап айтқанда, жарыстар National Indoor Stadium, Capital Indoor Stadium және National Speed Skating Oval ареналарында ұйымдастырылады.
Спорттық жарыстармен қатар қалада ауқымды фестивальдік бағдарлама жоспарланған. Қонақтар мен жанкүйерлер үшін арнайы фан-аймақтар, мәдени іс-шаралар, спортшылармен кездесулер, цифрлық интерактивті жобалар және түрлі ойын-сауық бағдарламалары ұйымдастырылады.
Сондай-ақ чемпионаттардың жарыс бағдарламасы аяқталғаннан кейін ISU Skating Awards халықаралық сыйлығын табыстау рәсімі өтеді.
BEIJING28 жобасы қысқы спорт түрлерін дамытудағы жаңа кезең ретінде бағаланып отыр. Ұйымдастырушылардың пікірінше, бұл бастама әлем чемпионаттарын өткізудің жаңа стандартын қалыптастыруы мүмкін.
