Мемлекет басшысы Қасым-Жомарт Тоқаев Қорғаныс министрі Дәурен Қосановты қабылдап, ведомствоның жыл басынан бері атқарған жұмыстарының қорытындысын қарады, деп хабарлайды Adym.kz ақпараттық сайты Ақордаға сілтеме жасап.
Кездесу барысында Президентке Қарулы күштердің жауынгерлік даярлығы, әскери қызметшілерді әлеуметтік қолдау шаралары және әскери қызметтің беделін арттыру бағытында жүргізіліп жатқан жұмыстар туралы баяндалды.
Дәурен Қосанов қорғаныс саласындағы цифрландыру үдерісі мен «Цифрландыру және жасанды интеллект жылы» аясында қолға алынған жобалар жөнінде ақпарат берді. Сондай-ақ әскери басқару жүйелерін жетілдіру, автоматтандырылған басқару құралдарын енгізу және цифрлық инфрақұрылымды дамыту мәселелеріне тоқталды.
Министр әскери басқару органдары арасындағы өзара іс-қимылды нығайтуға және әскердің жауынгерлік мүмкіндігін арттыруға бағытталған «Батыл тойтарыс – 2026» стратегиялық командалық-штабтық оқу-жаттығуларына дайындық барысы туралы есеп берді.
Сонымен қатар Голан жоталарындағы екінші ұлттық бітімгерлік контингент миссиясының сәтті аяқталғаны және үшінші контингенттің ротациясы басталғаны айтылды. Қазақстандық әскери қызметшілердің халықаралық бейбітшілік пен қауіпсіздікті қамтамасыз етуге қосқан үлесі жоғары бағаланғаны атап өтілді.
Кездесуде әскерге шақыру науқанының барысы, әскери қызметшілердің мәртебесін көтеру және жастарды әскери-патриоттық рухта тәрбиелеу мәселелері де талқыланды. Атап айтқанда, 21-27 маусым аралығында Бурабайда өтетін «Айбын – 2026» халықаралық әскери-патриоттық жастар жиынына дайындық жұмыстары қаралды.
Кездесу қорытындысында Қасым-Жомарт Тоқаев Қарулы күштердің жауынгерлік даярлық жүйесін одан әрі жетілдіруді, армияны цифрлық трансформациялау жұмыстарын жеделдетуді және елдің қорғаныс қабілетін күшейтуді тапсырды.
