Қазақстандықтар таяу арада зейнетақы жинағының бір бөлігін мерзімінен бұрын алуға арналған жаңа жеткіліктілік шегін біледі. Еңбек және халықты әлеуметтік қорғау министрі Асқарбек Ертаевтың мәлімдеуінше, жаңа көрсеткіштер 10 күн ішінде көпшілікке жарияланады, деп хабарлайды Adym.kz ақпараттық сайты.
Үкіметте өткен баспасөз брифингінде ведомство басшысы бұл бағыттағы жұмыстардың қалай жүріп жатқанын түсіндірді. Министрдің айтуынша, есептеу тәртібіне өзгерістер енгізілген, бірақ нақты сандарды БЖЗҚ жариялайды.
«Біз, Еңбек министрлігі ретінде, тек есептеу формуласына өзгеріс енгіздік. Заңнамаға сәйкес, бұл функция Бірыңғай жинақтаушы зейнетақы қорына (БЖЗҚ) жүктелген. Олар 10 күн ішінде жариялайды, сонда бәріміз шектердің қаншалықты өскенін көреміз»,-деді Асқарбек Ертаев.
Министр әзірге әртүрлі жастағы азаматтар үшін шектің нақты қалай өзгеретінін ашып айтқан жоқ. Оның сөзінше, 20 жастағы немесе 40 жастағы қызметкерлер үшін бекітілетін сома туралы нақты ақпарат БЖЗҚ өз есептеулерін аяқтағаннан кейін ғана қолжетімді болады.
Зейнетақы жинағының ең төменгі жеткіліктілік шегі бұл азаматтардың өз шотында қалдыруы тиіс міндетті сомасы. Егер жинақ бұл шектен асатын болса, артық бөлігін тұрғын үй жағдайын жақсартуға, емделуге ақы төлеуге, сенімгерлік басқаруға беруге пайдалануға болады.
Есептеу формуласының өзгеруіне байланысты шекті деңгейдің өсетіні анық, алайда оның қаншалықты көтерілетіні алдағы 10 күн ішінде белгілі болады. Тұрғындар жаңа ақпаратты тікелей БЖЗҚ-ның ресми ресурстарынан тексере алады.
