ADYM.KZ / 10 маусымнан бастап Түркістандағы Қожа Ахмет Ясауи кесенесі аумағына шетел азаматтары үшін кіру билеттерінің құны өзгерді. Жаңа тарифтер Мәдениет және ақпарат министрлігі бекіткен бағалар тізбесіне сәйкес енгізілді.
«Әзірет Сұлтан» ұлттық тарихи-мәдени музей-қорығының мәліметінше, енді Қожа Ахмет Ясауи кесенесінің аумағына, Ясауи музейі мен Сирек жәдігерлер залына кіру үшін алыс шетел азаматтары 5000 теңге төлейді. Ал ТМД елдерінен келетін келушілер үшін билет бағасы 2000 теңге болып белгіленді.
Бұған дейін шетел азаматтары үшін билет құны 2000 теңге, ал ТМД елдерінің азаматтары үшін 1500 теңге болған.
Қазақстан азаматтары үшін билет бағасы өзгеріссіз қалды. Ересектер үшін кіру ақысы – 1000 теңге, студенттер мен зейнеткерлер үшін – 500 теңге, мектеп оқушылары үшін 300 теңге көлемінде сақталды.
Сонымен қатар биылдан бастап бірқатар санаттағы азаматтарға музей-қорық нысандарына тегін кіру мүмкіндігі берілді. Олардың қатарында I және II топтағы мүгедектігі бар азаматтар мен бала кезінен мүгедектігі бар жандар (бір еріп жүрушісімен), Екінші дүниежүзілік соғыс ардагерлері мен оларға теңестірілген тұлғалар, Ауған соғысының ардагерлері, «Алтын алқа» және «Күміс алқа» иегері көпбалалы аналар бар.
Сондай-ақ мектеп оқушылары тобын бастап келген бір мұғалімге, туристік топтың бір гидіне және мектеп жасына дейінгі балаларға да тегін кіру қарастырылған.
Бұдан бөлек, мектеп оқушылары жазғы және тоқсандық демалыс кезеңдерінде Қожа Ахмет Ясауи кесенесі аумағына тегін кіре алады.
