ADYM.KZ / Премьер-Министр Олжас Бектенов 16-шы Astana Mining & Metallurgy 2026 конгресінің пленарлық отырысына қатысып, Қазақстан экономикасының даму көрсеткіштеріне тоқталды.
Үкіметтің баспасөз қызметінің мәліметінше, 2025 жылдың қорытындысы бойынша ел экономикасы 6,5 пайыздық тұрақты өсім көрсеткен. Нәтижесінде Қазақстанның жалпы ішкі өнімі алғаш рет 300 млрд долларлық межеден асты.
Премьер-Министрдің айтуынша, бұл көрсеткіш Мемлекет басшысы Қасым-Жомарт Тоқаев жүргізіп отырған технологиялық жаңғыруға, инвестиция тартуға, өнеркәсіп пен адами капиталды дамытуға бағытталған экономикалық саясаттың нәтижесі.
Ол өз сөзінде жаңа Конституция меншік құқығын қорғау кепілдіктерін күшейтіп, заң үстемдігін нығайту арқылы елдің ұзақ мерзімді экономикалық дамуына берік негіз қалыптастыратынын атап өтті. Оның айтуынша, бұл әсіресе тау-кен металлургия кешенін дамыту үшін маңызды, өйткені саладағы ірі жобалар қомақты инвестициялар мен ұзақмерзімді жоспарлауды талап етеді.
Сондай-ақ Үкімет басшысы Қазақстанның бәсекелік артықшылықтарына сүйене отырып, жаңа буын өндірістерін құру арқылы тұрақты экономикалық өсімді қамтамасыз ету бағытын жалғастыратынын жеткізді.
Айта кетейік, Astana Mining & Metallurgy конгресі жыл сайын тау-кен металлургия саласының өзекті мәселелерін талқылайтын халықаралық алаң саналады. Биылғы форумға әлемнің 16 елінен 1,5 мыңнан астам делегат қатысты. Бұл Қазақстанның тау-кен металлургия кешеніне халықаралық қызығушылықтың жоғары екенін көрсетеді.
