ADYM.KZ / Абай облысында өткен мәдени іс-шара барысында Shakarim University-дің «Өнер» кафедрасының оқытушысы, ҚР Мәдениет саласының үздігі әрі университеттің Құрметті профессоры Қайрат Қабышев халықаралық рекорд иегері атанды.
Ғылым және жоғары білім министрлігінің мәліметінше, өнерпаз этномәдениет бағыты бойынша Азия мен Африканың дүниежүзілік рекордтар кітабына енгізілді. Рекордтың ресми тіркелуіне байланысты оған арнайы сертификат пен күміс медаль табысталды.
Қайрат Қабышев рекорд орнату барысында қазақтың 102 дәстүрлі әнін 5 сағат 29 минут бойы үздіксіз орындады. Ерекшелігі сол, барлық шығармалар нотасыз, мәтінсіз және фонограммасыз шырқалып, орындаушы әндерді өзі аспаппен сүйемелдеді.
Рекорд талаптарына сәйкес әр 25 әннен кейін 15 минуттық үзіліс жасауға мүмкіндік берілгенімен, өнер иесі бұл құқықты пайдаланбаған.
Іс-шараға халықаралық Global Best of Records (GBR) ұйымының Азия және Африка дивизионы бойынша рекордтарды тіркеу жөніндегі бас офицері Қуандық Құдайберген қатысып, көрсетілген нәтиженің бірегей екенін атап өтті. Оның айтуынша, сарапшылар шешімімен рекорд ресми түрде тіркеліп, дүниежүзілік рекордтар кітабының 2026 жылғы басылымына енгізіледі.
Жобаға сарапшылық баға берген Қазақстанның еңбек сіңірген қайраткері, Құрманғазы атындағы Қазақ ұлттық консерваториясының профессоры Еркін Шүкіман бұл жетістік қазақтың дәстүрлі ән өнерін халықаралық деңгейде насихаттауға үлкен үлес қосатынын айтты.
Өз кезегінде Қайрат Қабышев рекорд ұлттық әншілік мектептің дәстүрі мен ұстаздар тәлімінің жемісі екенін атап өтті. Оның пікірінше, мұндай бастамалар жастардың ұлттық өнерге қызығушылығын арттырып, мәдени мұраны дәріптеуге ықпал етеді.
Мамандардың айтуынша, бұл жетістік қазақтың дәстүрлі ән өнерінің халықаралық деңгейде танылып, ұлттық мәдениеттің жаһандық кеңістіктегі беделі артып келе жатқанын көрсетеді.
