АЙМАҚ. ADYM.KZ / ҚР Оқу-ағарту министрлігі 2025–2026 оқу жылының қорытындысы бойынша еліміздегі ең үздік мектептердің жаңа рейтингін жариялады. Жалпы білім беретін пәндер бойынша республикалық олимпиаданың нәтижесіне негізделген бұл тізімге Шымкент қаласының алты бірдей білім беру ұйымы кірді.Биылғы республикалық олимпиада еліміздің алты өңірінде ұйымдастырылып, оған 676 мектептен 1636 оқушы қатысты. Рейтинг арнайы ұпай жүйесімен есептелді: алтын медальға – 3 ұпай, күміс кезеңге – 2 ұпай, ал қола жүлдеге – 1 ұпай берілді. Осы бағалау қорытындысы бойынша елімізден оқ бойы озық шыққан 114 мектеп іріктеліп алынған.
Шымкенттен үздік шыққан білім ошақтары:
- «Білім-Инновация» ер балаларға арналған №1 лицей-интернаты;
- Дарынды балаларға арналған №1 мамандандырылған ІТ лицей-интернаты;
- З. Хусанов атындағы №110 орта мектеп;
- Айбек атындағы №14 орта мектеп;
- А. Пушкин атындағы №1 мектеп-гимназия;
- Мұхамед Хайдар Дулати атындағы үш тілде оқытатын №8 мамандандырылған гимназия.
Бұл жетістік Шымкент қаласындағы білім саласында олимпиадалық даярлық бағыты бойынша жүйелі жұмыс жолға қойылғанын көрсетеді. Айта кетейік, өткен 2024–2025 оқу жылында мегаполистен бес мектеп үздік атанса, биыл бұл көрсеткіш алтыға жетіп, үшінші мегаполистің білім деңгейі жаңа белеске көтерілгенін дәлелдеді.
